Шығыс Қазақстан облысында 15 қарашада «Өскемен — Алтай — Үлкен Нарын — Катонқарағай — Рахман қайнары» республикалық тас жолының жүру бөлігіне жартастан ірі тастар мен ұсақ қиыршық құлады. Опырылу 25-шақырымда болды. Бұл туралы «ҚазАвтоЖол» ұлттық компаниясының облыстық филиалына сілтеме жасап, Kazinform хабарлады.
Куәгерлердің айтуынша, тас құлаған сәтте жолдың бұл бөлігінде көлік болмаған, сондықтан ешкім зардап шекпеді, көлік те зақымданбады. Бірақ опырылудан кейін жүргізушілер ірі тас кесектері мен жыныс сынықтарын айналып өтуге мәжбүр болды.
«ҚазАвтоЖолдың» ШҚО филиалы тас құлағанын патрульдеу кезінде байқағанын айтты: «Бүгін сағат 14:00-де республикалық маңызы бар «Өскемен — Алтай — Үлкен Нарын — Катонқарағай — Рахман қайнары» автожолының 25-шақырымында патрульдеу барысында тас құлауы анықталды. Көліктердің қауіпсіз әрі үздіксіз жүруі қамтамасыз етілді. Қазір бұл учаскеде салдарын жою жұмыстары жүргізіліп жатыр».
Жүргізушілер үшін мұның мәні: жол ашық, жабылған жер де, айналма жол да жоқ. Техника жол төсемін тастан тазартып үлгерді, бірақ жол жөндеушілер тастың қайта құламауы үшін беткейді бақылауды жалғастырып отыр. Температура құбылып тұрған кезде жүргізушілерден жылдамдық режимін сақтап, тас жолдың таулы бөліктерінде аса сақ болу сұралады.
Тас құлаған жердегі видеоны «ВКО в теме» өңірлік парақшасы жариялады — онда тастардың тура жүру бөлігінде жатқаны көрінеді:
Алтайға баратын тас жол — Өскеменнен Алтай және Катонқарағай аудандарына қатынайтын басты жол. Күзде елдің шығысы мен солтүстігінде ауа райына байланысты қозғалыс бірнеше рет шектелді: кейбір тас жолдарда жазғы шиналы көліктерге жол жабылды. Жолдағы жағдайды «ҚазАвтоЖолдың» тәулік бойы жұмыс істейтін 1403 байланыс орталығынан білуге болады.
