Негрейра ісі деп аталатын іс бойынша тергеу ресми түрде аяқталды, деп хабарлайды Cadena SER. 13 қарашада Барселонаның № 1 тергеу сотында соңғы екі куә — «Барселона Б» командасының бұрынғы бас бапкері Жерар Лопес пен команданың бұрынғы делегаты Тони Алонсо жауап берді. Енді судья Алехандра Хильге «Реал» сұраған қаржылық есептерді «Барселонадан» алу ғана қалды. Содан кейін ол істі жабу немесе сотқа жіберу туралы шешім қабылдайды.
Лопес «Барса Б» командасын 2015–2018 жылдары басқарған. Сотта ол Негрейра мен оның ұлы дайындаған төрешілер туралы есептерді пайдаланғанын растады: «Иә, мен оларды осы санаттағы төрешілерді жақсырақ білу үшін пайдаландым». EFE агенттігі сот көздеріне сілтеме жасап хабарлағандай, Алонсо есептер бар болғанын ғана емес, фарм-клубта матчтарға дайындалғанда қолданылғанын да айтқан. Екеуі де ол кезде VAR әлі болмағанын, ал Примерадан төменгі лигалардың төрешілерін аз білгенін түсіндірді. Есептерде төрешінің мәнері сипатталған, мысалы, ол карточканы көп немесе аз көрсетуге бейім бе.
Бұл жауаптар сол жылдары негізгі командаға жетекшілік еткен Луис Энрике мен Эрнесто Вальверденің сөзіне қайшы келеді. 2025 жылдың соңында жауап алу кезінде екеуі де бұл есептер туралы білмегенін және оларды ешқашан пайдаланбағанын мәлімдеген. «Барселона» басынан бері төрешілерге ықпал ету үшін емес, төрешілік бойынша кеңес үшін төлегенін айтып келеді. Лопес пен Алонсо осы нұсқаны қолдады.
Бастапқыда сот «Реалдың» «Барселонаның» 2010–2021 жылдардағы аудиторлық қорытындылары мен қаржылық есептілігін сұраған өтінішін қабылдамады, бірақ Барселона провинциялық соты мадридтіктердің шағымын ішінара қанағаттандырды. Cadena SER мәліметінше, құжаттар шамамен 2027 жылдың басында түседі. Қыркүйекте судья тергеуді тағы жарты жылға ұзартудан бас тартты, дегенмен бұны «Реал» мен прокуратура сұраған еді. «Реал» бұл шешімге шағым түсірді.
Іс 2023 жылғы наурыздан бері созылып келеді. Тергеу «Барселонаның» 2001–2018 жылдары Төрешілер техникалық комитетінің (CTA) бұрынғы вице-президенті Хосе Мария Энрикес Негрейраға төлеген 7 млн еуродан астам, яғни 3,4 млрд теңгеден астам қаражатын тексеріп жатыр. Прокуратура спорттық сыбайлас жемқорлық, адал емес басқару және құжаттарды бұрмалау нұсқаларын қарастыруда. Каталония сот медицинасы институтының қорытындысы бойынша, Негрейра ауыр когнитивтік бұзылысқа байланысты процеске қатыса алмайды, сондықтан оның қорғаушысы оған қатысты істі жабуды сұрап отыр.
