Екібастұздағы теміржол стансасында 62 жастағы қызметкерді жүк вагоны басып кетіп, ол оқиға орнында көз жұмды. Қылмыстық іс 10 қарашада қозғалғанын ІІМ Көліктегі полиция департаменті хабарлады.
Марқұм стансада вагондар қозғалысының жылдамдығын реттеуші болып істеген. Оқиғаның қалай болғанын полиция айтпай отыр: қалған мәліметтер ҚПК-нің 201-бабына сәйкес тергеу мүддесі үшін жария етілмейді.
Істі Павлодар стансасындағы желілік полиция бөлімі теміржол көлігі қозғалысының қауіпсіздігі мен оны пайдалану ережелерін бұзу дерегі бойынша қозғады, бұл бұзушылық абайсызда адам өліміне әкеп соққан. «Қажетті тергеу әрекеттері жүргізілуде», — деді Көліктегі полиция департаментінде. Тергеушілер оқиғаның себебі мен мән-жайын анықтап жатыр.
Көліктегі полиция теміржол нысандары аса қауіпті аймақ екенін еске салып, жол мен құрамдардың маңында жеке қауіпсіздік ережелерін сақтауды сұрады.
Екібастұзда вагонға байланысты қайғылы оқиға бұрын да болған. 2024 жылғы сәуірде Екібастұз МАЭС-1 аумағында 22 жастағы жұмысшы екі вагонның арасында қысылып қалып, оны құтқару мүмкін болмады. Ал 11 қарашада Алматы әуежайындағы перрон құрылысында мердігер компанияның жұмысшысы қаза тапты. Еңбек және халықты әлеуметтік қорғау министрлігінің дерегінше, 2025 жылы Қазақстанда өндірісте 188 адам қаза тапқан, одан бір жыл бұрын бұл көрсеткіш 202 болған.
