«МузАРТ» триосының солисі Мейрамбек Бесбаев 50 жас мерейтойында домбырасының 15 млн теңгеге сатылуына қатысты сынға жауап берді. Әншінің айтуынша, сауда-саттық ақша табу үшін ұйымдастырылмаған: достары аспаптың қадірін көтеріп, кешті есте қаларлық еткісі келген. Әншінің түсіндірмесі жазылған бейнежазба жұбайы Мархабаттың Instagram парақшасында жарияланды.
«Жігіттер домбыраның қадірін көтергісі келді», – деді Бесбаев. Оның сөзінше, мұның бәрі «тек қызық болсын, есте қалсын деп» жасалған. Сауда-саттықты сынағандарды әнші әңгімені әсірелеп жіберді деп кінәлады: «Қазақтар қосқанды жақсы көреміз ғой. “Бұл әртістер құтырған, әбден тойынған” деп».
Төменде әншінің сыншыларға жауап берген бейнежазбасы.
Мерейтойдағы сауда-саттықты ақын Ақберен Елгезек 4,4 млн теңгеден бастады, әнші Тоқтар Серіков бағаны 10 млн теңгеге көтерді, ал домбыраны 15 млн теңгеге орындаушы Заттыбек Көпбосынұлы алды. Аспапқа таласқан азаматтар туралы Бесбаев жылы лебіз білдірді: «Аман болыңыздар. Бәріңізге осы жігіттердің жолы жұғысты болсын».
Әнші келіні туралы да айтты: «Екі домбыра еді. Келініміз Айжан “Маған айфон керек емес, ұлылардың қолы қойылған домбыра керек” деп, оның қадірін одан сайын көтерді».
Бесбаев 50 жасқа толған мерейтойын 7 қарашада атап өтті. Сауда-саттық түсірілген видео әлеуметтік желіде тарағаннан кейін қолтаңба қойылған домбыраның сатылуы дау туғызды: біреулер аспапты Ұлттық музейге тапсыруды, енді біреулер сол ақшаға мұқтаж отбасына пәтер алып беруді ұсынды. Мейрамбек Бесбаев – әнші әрі актер, қазақ эстрадасындағы ең танымал топтардың бірі «МузАРТ»-тың солисі. Биыл күзде ол «50 жас» атты мерейтойлық бағдарламамен өнер көрсетіп жүр.
