Kraken криптобиржасының иесі, америкалық Payward компаниясы 2026 жылғы III тоқсанда 60 млн доллар (шамамен 26,6 млрд теңге) түзетілген EBITDA алды. Бұл бір жыл бұрынғыдан (178,6 млн доллар) үштен екіге аз, бірақ II тоқсандағыдан (23 млн доллар) 2,6 есе көп. Компания тоқсанның қаржылық қорытындысын 13 қарашада жариялады.
«Payward-тың 2026 жылғы III тоқсандағы қаржылық қорытындысы жарияланды. Платформаның жалпы маржасы – 487 млн доллар, бұл II тоқсандағыдан 12%-ға көп. Түзетілген EBITDA – 60 млн доллар, рентабельділік 5%-дан 12%-ға өсті», – деп жазды компания X әлеуметтік желісінде.
Платформаның жалпы маржасы – Payward түзетілген түсімнің орнына енгізген жаңа көрсеткіш. Ол 487 млн доллар (шамамен 216 млрд теңге) болып, бір жылда 12%-ға азайды. Бұл көрсеткіштен, атап айтқанда, стейкинг үшін төленетін сыйақылар шегеріледі. Сауда көлемі жылдық есепте 30%-ға қысқарып, 353 млрд долларға (шамамен 156,6 трлн теңге) түсті. Пайданың азайғанын акционерлерге жолданған хатқа сілтеме жасап алғаш Bloomberg хабарлады.
Есесіне Kraken нарықтағы үлесін арттырып келеді. Қыркүйекте әлемдік спот-сауда көлемінің 6,5%-ы осы биржаның үлесіне тиді, бір жыл бұрын бұл көрсеткіш 3,3% болған. Ал жалпы салада спот-сауда тоқсан ішінде 7%-ға азайған. Шотын толықтырған клиенттер саны 37%-ға өсіп, 7,1 миллионға жетті. Клиенттердің активтеріне байланысты қызметтерден түсетін маржа 26%-ға артып, 128 млн доллар (шамамен 56,8 млрд теңге) болды.
Kraken 2011 жылы АҚШ-та құрылған. Қыркүйекте Nasdaq биржасы Payward-қа компанияны 21 млрд долларға (шамамен 9,3 трлн теңге) бағалап, инвестиция салды.
Kraken Қазақстанда жұмыс істеуге дайындалып жатыр. 22 қазанда АХҚО-ның Қаржылық қызметтерді реттеу комитеті (AFSA) Payward Kazakhstan компаниясына лицензия беруді алдын ала мақұлдады: ол цифрлық активтермен сауда алаңын басқарып, принципал және агент ретінде мәмілелер жасап, клиенттердің активтерін сақтай алады. Кейін Kraken Жасанды интеллект және цифрлық даму министрлігімен ынтымақтастық туралы меморандумға қол қойды, деп жазды AIR Press. АХҚО-да жұмысты бастау мерзімі айтылмаған.
