Биткоин 14 қарашада 67 мың доллардан төмен түсті. CoinDesk дерегінше, Астана уақытымен сағат 10:45 шамасында ол 66 847 доллар (шамамен 29,65 млн теңге) тұрды, бұл бір тәулік бұрынғыдан 1,8%-ға арзан. Криптовалюта қатарынан алтыншы апта құлдырап барады. Рекорд – тоғыз апта қатарынан құлдырау – 2022 жылы тіркелген.
CoinDesk есебінше, қараша басынан бері биткоин 11%-ға, IV тоқсан басынан бері 17%-ға, жыл басынан бері 21%-ға арзандады. 2025 жылғы 6 қазанда тіркелген 126 080 долларлық тарихи шыңнан баға 47%-ға жуық төмендеді. Ethereum 1896 долларға дейін арзандап, тамыздан бері алғаш рет 2 мың доллардан төмен саудаланып жатыр.
13 қарашада криптобиржалардағы позициялардың мәжбүрлі жабылуы 1,6 млрд доллардан асты. CoinDesk биткоинге түскен қысымды ішінара Anthropic компаниясының алдағы IPO-сымен байланыстырады: компания Nasdaq биржасында 64,4 млрд долларға дейін, жеке орналастыруда тағы 26 млрд доллар тартуы мүмкін, ал оның құны шамамен 1,4 трлн доллар деп бағаланады. Басылымның еске салуынша, 12 маусымдағы SpaceX IPO-сы алдында биткоин бес күнде шамамен 75 мың доллардан 60 мың долларға дейін арзандаған.
Нарыққа Nvidia басшысы Дженсен Хуангтың отставкаға кетуі және ФРЖ 9 желтоқсанда мөлшерлемені 0,25 пайыздық тармаққа көтереді деген күтулер де қысым түсіріп отыр. Доллар индексі соңғы 19 айдағы ең жоғары деңгейге көтерілді.
Бұған дейін AIR Press биткоиннің тамыздан бергі ең төменгі деңгейге түскені туралы жазған.
