Криштиану Роналду Instagram парақшасында өзінің алғашқы телесериалы — Day 1s өндірісі басталғанын хабарлады. «Ән-Наср» шабуылшысы түсірілім алаңынан кадрлар жариялап, жаңа мәліметтер жақын арада болатынын айтты.
Сериалды UR·Marv студиясы түсіріп жатыр. Оны Роналду 2025 жылғы сәуірде британдық режиссер Мэттью Вонмен бірге құрған. Вон — «Kick-Ass» және «Kingsman» фильмдерінің авторы. Day 1s — компанияның алғашқы ірі жобаларының бірі. Түсірілім Лондонда өтіп жатыр, студия оны сырттан инвестор тартпай қаржыландырып отыр.
Day 1s — футбол агенттерінің әлемі туралы драма. Жоба туралы алғаш рет жазда The Sun басылымы жазған еді. Оның дерегінше, басты рөлді — британдық агент Стэнли Далтонды — «Homeland» және «Billions» сериалдарының жұлдызы Дэмиан Льюис сомдайды. Идеяның авторы — Тьерри Анридің агенті Даррен Дейн, ол өзі де кадрда көрінеді. Роналду жариялаған суреттерде Льюис, британдық рэпер Dave және «Брентфордтың» киім ауыстыратын бөлмесі бар. Анри да түсірілімнен кадр бөлісті: онда ол Льюиспен қатар үстел басында отыр. Роналдудың өзі жобада атқарушы продюсер, бірнеше эпизодта көрінуі де мүмкін. Премьера күні мен платформа әзірге айтылмады.
Студия мұнымен шектелмейді: Deadline дерегінше, Роналду мен Вон каскадёрлер туралы Stuntnuts фильмін де дайындап жатыр. Онда Крис Хемсворт ойнайды, Мэтт Деймон да көрінеді.
Сериал туралы жаңалық 41 жастағы Роналду Португалия құрамасындағы мансабын аяқтағаннан кейін көп ұзамай шықты. Клубтық футболда португал «Ән-Насрда» ойнауын жалғастырып жүр, ал мансабында 985 ресми гол соққан.
