Kia «Алтын руль» сыйлығының 50 жылдық тарихында бір жылда үш марапат алған алғашқы еуропалық емес марка атанды. «Алтын руль» — Германиядағы ең беделді автокөлік марапаттарының бірі. Жеңісті EV2 және EV5 электр кроссоверлері мен K4 Sportswagon универсалы әкелді, деп 10 қарашада хабарлады Kia.
EV2 электрокөлігі «30 мың еуродан арзан үздік көлік» санатында жеңді. EV5 үздік ықшам кроссовер атанып, Audi Q3 және Cupra Formentor VZ5 модельдерін басып озды. Бензинді K4 Sportswagon ықшам класта топ жарды, онда оның бәсекелестері Volkswagen ID.3 Neo мен Cupra Born болды.
Сыйлықты AUTO BILD журналы мен BILD am Sonntag газеті береді. Редакция 90 жаңа модельді іріктеп, оқырмандар олардың ішінен 27 финалисті — тоғыз кластың әрқайсысынан үш көліктен — таңдады. Содан кейін құрамында ралли чемпионы Себастьен Ожье мен теннисші Борис Беккер бар 23 адамдық қазылар алқасы көліктерді DEKRA-Lausitzring трассасында сынақтан өткізді. Көліктің басқарылуы, жайлылығы, қолданудағы ыңғайлылығы, сапасы, күнделікті тұрмыстағы пайдасы, экологиялығы және бағасы мен жабдықталуының арақатынасы бағаланды.
«Үш „Алтын руль“ алған алғашқы еуропалық емес марка атану — Kia үшін үлкен мәртебе», — деді Kia Corporation президенті әрі бас директоры Сон Хо Сон. AUTO BILD бас редакторы Робин Хорниг Kia бірден үш класта және баға санатында жеңгенін, оның ішінде электрокөліктермен де, бензинді модельмен де озық шыққанын атап өтті.
EV2 — Kia-ның ұзындығы 4,06 метр болатын кіші электр кроссовері: жүксалғышына 403 литрге дейін жүк сыяды, WLTP циклі бойынша жүріс қоры — 453 шақырымға дейін. EV5 көлемі жағынан Sportage-ге жақын, алдыңғы және толық жетекпен шығады, бір зарядпен 550 шақырымнан астам жол жүреді және салмағы 1800 килограмға дейінгі тіркемені сүйрей алады. K4 Sportswagon — нарыққа мамыр айында шыққан бензинді универсал.
Енді Kia-ның жалпы сегіз «Алтын рулі» бар. Бұған дейін бұл сыйлықты XCeed (2019), Sorento (2020), Niro EV (2022), EV9 (2023) және EV3 (2024) алған. Қазақстанда Kia жергілікті құрастыру көлемі бойынша үшінші орында тұр: Қазақстан автокөлік одағының (ҚАО) деректері бойынша, 2026 жылдың тоғыз айында елде 17 712 Kia көлігі шығарылды, олардың ішінде ең көбі — Sportage. Қостанайдағы жеке Kia Qazaqstan зауыты 2025 жылы іске қосылды.
