Қазақстанның үздік шахматшысы Бибісара Асаубаева Будапештте өтіп жатқан Total Chess World Championship Tour Pilot турнирінде америкалық гроссмейстер Эндрю Хонгқа матчта жеңіліп, жарыстың өзін қатты шаршатқанын мойындады. Ол өз әсерімен Telegram-арнасында бөлісті.
«Бәріңізге сәлем. Мен бүгін матчта жеңілдім, бірақ екі партияны ұттым. Біреуін блицте. Айтпақшы, біріншісін. Және рапидте біреуін. Бүгін тең ойынсыз өтті. Шынымды айтсам, турнир қатты қажытты. Мен шынымен қатты шаршадым. Он күнде әлемнің ең мықты шахматшыларына қарсы 40-тан астам партия ойнайсың, бәрі керемет, бірақ бұл жүйке қуатын көп алады. Турнирдің ертең аяқталатынына қуаныштымын», — деп жазды Асаубаева.
Қазақстандық шахматшы үшін турнирдің ең дүбірлі сәті плей-оффтағы Магнус Карлсенмен тартыс болды. Норвегиялық гроссмейстер Fast Classic форматындағы соңғы партияларды онымен екі рет ойнаудан бас тартты: ол кезде ойын күніндегі жеңісін қамтамасыз етіп қойған еді. Карлсенге техникалық жеңіліс берілді, бірақ келесі кезеңге сол өтті. Осыдан кейін тағы екі қатысушы осылай істеді: Абхиманью Мишра Вайшали Рамешбабумен, ал Рихард Раппорт Айк Мартиросянмен ойнаудан бас тартты.
The Times of India басылымының жазуынша, мәселе ережеде. Ойын күнінде қатысушы 20 ұпай жинай алады: блицте төрт, рапидте сегіз және Fast Classic-те тағы сегіз ұпай. Жеңіс алдын ала қамтамасыз етілсе, соңғы партия ештеңе шешпейді. Total Chess басшысы Кьелл Мадланд пилоттық турнирден кейін ойыншылардың ұсыныстарын ескеретінін айтты.
Будапешттегі турнир 10 қарашада басталды. Асаубаева тобында бесінші орын алып, плей-оффта алдымен Карлсенмен, кейін Хонгпен кездесті.



