Қазақстандық боксшы Ақнұр Тұрсынғали Дакардағы IV жазғы жасөспірімдер Олимпиада ойындарының күміс жүлдегері атанды. 12 қарашада 57 келіге дейінгі салмақтағы финалда ол бразилиялық Сара Кампосқа төрешілердің бөлінген шешімімен (1:4) жол берді, деп хабарлайды Sports.kz. Екінші раундта төреші қазақстандық боксшыға нокдаун санады.
Kursiv Media есебінше, Тұрсынғалидің күмісі Сенегалдағы Ойындарда Қазақстан құрамасының алтыншы медалі болды. Елге алтынды дзюдошы Фатима Супыгалиева мен велошабандоз Анель Ташбай әкелді, ал қоланы триатлоншы Рамазан Айнегов, таэквондошы Любовь Юн және боксшы Марал Төлепберген жеңіп алды.
Бокс турнирінің екінші қазақстандық финалисі — 70 келіге дейінгі салмақта өнер көрсететін Бибарыс Әшірбай. Жартылай финалда ол мексикалық Хорхе Луис Ньеблас Гутьерресті төрешілердің бірауызды шешімімен (5:0) жеңіп, финалға жолдама алды.
Тұрсынғали Дакарда үш рет рингке шықты. 9 қарашадағы ширек финалда ол Ойындарды қабылдаушы ел өкілі Хадидиату Боироны бірауызды шешіммен (5:0) жеңіп, осы Ойындарда Қазақстанға бокстан алғашқы медальды қамтамасыз етті. 11 қарашадағы жартылай финалда украиналық Евангелина Петрукты нокдаунға жіберіп, 4:1 есебімен жеңді де, финалға шықты. Кампос өз жартылай финалында венгриялық Жофия Ченге Кишті 5:0 есебімен ойсырата жеңді.
Жасөспірімдер Олимпиада ойындарын Халықаралық олимпиадалық комитет 15–18 жастағы спортшылар үшін өткізеді. Сенегал астанасындағы Ойындар 31 қазаннан 13 қарашаға дейін жалғасады және Африка тарихындағы алғашқы олимпиадалық жарыс болды. Дакарда Қазақстан намысын 11 спорт түрінен 18 спортшы қорғап жүр.
