112 қызметінен келетін шұғыл SMS-хабарламалар шынымен де кешігуі мүмкін — мұны Қазақстан Төтенше жағдайлар министрлігі мойындады. Төтенше жағдайлар министрі Мұрат Мұханов 10 қарашада журналистердің сұрағына жауап берді. Ведомствоның айтуынша, қазір мұндай хабарламаларды абоненттерге шұғыл жеткізу үшін ұялы байланыс операторларымен бірге жұмыс істеп жатыр.
ТЖМ әр өңірге арналған хабарламаны «Қазгидромет» деректері негізінде жібереді. Одан кейін ұялы байланыс операторлары оларды абоненттерге кезекпен таратады, сондықтан кейбір адамдар хабарламаны кешірек алады. Таратуға бюджеттен арнайы қаржы бөлінбейді: бұл жұмыс министрлік операторлармен бұрын жасасқан меморандумдарға сәйкес жүргізіледі.
Жер сілкінісі үшін Mass Alert деген бөлек жүйе жұмыс істейді. Ол Алматыда және тағы тоғыз өңірде орнатылған. Министрліктің дерегінше, жүйе ескертуді адамдарға бір минуттан аспайтын уақытта жеткізеді және операторлардың таратуымен қатар жұмыс істейді. Сейсмикалық қауіпті басқа өңірлерде алдымен сейсмикалық станциялар орнатып, кейін Mass Alert жүйесін қосу жоспарланған. Мерзімі айтылмады.
Қазақстандықтар 112-ден келетін хабарламалардың кешігетініне, соның ішінде Алматыдағы жер сілкінісі кезінде де шағымданған. Сонымен қатар ауа райына қатысты ескертулер жиі келетіндіктен, көп адам оларға мән бермей, телефонын дыбыссыз режимге қояды. 10 қарашаға елдің барлық 17 облысында дауылды ескерту жарияланды, ал Алматыда кештен бастап нөсер жаңбыр мен ылғалды қар күтіледі.
