Tesla қазан айында Қытайда 8 817 электрокөлік сатты, бұл өткен жылмен салыстырғанда 66,1% аз. Компания үшін бұл — 2022 жылғы шілдеден бергі Қытай нарығындағы ең нашар ай: сатылым содан бері алғаш рет 10 мыңнан төмен түсті. Қытай ішіндегі сатылым қатарынан бесінші ай құлдырап келеді. Бұл деректерді Қытайдың жеңіл автокөліктер қауымдастығына (CPCA) сілтеме жасап, CarNewsChina жариялады.
Есесіне Шанхай зауытынан экспорт 66,3% өсіп, 59 012 көлікке жетті. Бұл — биылғы екінші нәтиже: одан көбі тек шілдеде, 66 330 көлік шетелге жөнелтілген. Зауыттың бір айда жөнелткен өнімінің 87%-ы экспортқа тиесілі болды — бұл оның тарихындағы рекорд, бұған дейінгі рекорд (76%) 2022 жылғы қазанда тіркелген. Зауыт барлығы 67 829 көлік жөнелтті, бұл бір жыл бұрынғыдан 10,3% көп.
Қытайдағы «жаңа энергиялы» көліктер нарығы — бұл елде электрокөліктер мен қосылатын гибридтерді осылай атайды — қазанда да төмендеді, бірақ әлдеқайда баяу: шамамен 1,1 млн көлік сатылып, бір жыл бұрынғыдан 13,7% азайды. Таза электрокөліктер шамамен 770 мың дана сатылды, бұл 5,3% аз.
Tesla сатып алушыларды тиімді шарттармен қайтаруға тырысып жатыр. Компания 30 қазаннан бастап Model 3 және Model Y-тің кейбір нұсқаларына бес жылға пайызсыз несие ұсынып отыр, ал ең төменгі бастапқы жарнаны 79 900 юаньнан 39 900 юаньға (шамамен 2,7 млн теңге) дейін түсірді. Ұсыныс 30 қарашаға дейін берілген тапсырыстарға жарамды. Артқы жетекті Model 3 Қытайда 235 500 юань (шамамен 16 млн теңге), жеңілдікпен 225 500 юань тұрады. Артқы жетекті Model Y — 263 500 юань (шамамен 18 млн теңге), жеңілдікпен 259 500 юань. Tesla Қытайда тек осы екі модельді, соның ішінде алты орындық Model Y L-ді шығарады.
Өткен аптада Tesla Cybercab роботаксиіне орын босату үшін 2027 жылдың ортасына қарай Техастағы Cybertruck пикабын шығаруды тоқтататынын жариялады: Electrek есебінше, пикаптың сатылымы жоспардың шамамен 10%-ын ғана құраған. Сонымен бірге 2026 жылдың бірінші тоқсанында Tesla электрокөліктердің әлемдік сатылымы бойынша BYD-ді қайтадан басып озған еді.
