Абай облысында республикалық маңызы бар «Семей – РФ шекарасы» автомобиль жолының 111 шақырымын жөндеу аяқталды. Жолдың техникалық жағдайы қазір 100% деп бағаланады, ал 2024 жылы бұл көрсеткіш 40% болған. Бұл туралы 9 қарашада облыс әкімдігі хабарлады, жолдың ашылуына өңір басшысы Берік Уәли қатысты.
Жұмыс жолдың үш учаскесінде жүрді. Мердігерлер жабынның төменгі және жоғарғы қабатын жаңартып, жол жиегін қалпына келтірді, белгі сызықтарын салды, бұрынғы су өткізу құбырларын жөндеп, жаңаларын төседі. Мал жүріс бөлігіне шықпауы үшін жол бойына 10 мың метр қоршау орнатылды, сондай-ақ екі жаңа аялдама мен демалыс алаңы салынды.
Бұл учаскеден күн сайын 1 650-ге жуық көлік өтеді. Жол Ресеймен шекарадағы «Ауыл» өткізу пунктіне апарады — бұл Абай облысындағы төрт бекеттің ең ірісі. Бекетті қайта жаңарту биыл басталды, жұмысты келесі жылы аяқтау жоспарланған. Оның алдында жүк көліктеріне арналған аумағы 2 800 шаршы метр күту алаңы салынып қойды.
Тас жол Бородулиха ауданы арқылы өтеді. Әкімдік жөндеуден кейін Новопокровка, Дмитриевка және Ауыл ауылдарында жол бойы сервисі дамиды деп күтіп отыр. Қазір жол бойында алты кафе мен тоғыз аялдама павильоны жұмыс істейді.
Өңірде жол жөндеу жалғасып жатыр: қазір 212,6 шақырым жолға орташа жөндеу жүргізілуде. Оның ішінде облыстық маңызы бар үш учаскенің жалпы ұзындығы — 41 шақырым, аудандық маңызы бар тоғыз учаскенікі — 91,4 шақырым. Бұдан бөлек 20 елді мекенде жалпы ұзындығы 80,2 шақырым болатын 80 көше жөнделіп жатыр.
