Chery Қытайда 53 882 көлікті кері шақырады. Олар — 2022 жылғы 6 маусым мен 2023 жылғы 31 желтоқсан аралығында құрастырылған Tiggo 5x кроссоверлері мен Omoda сериясының модельдері. Бұл көліктердің артқы осінде бойлық рычаг втулкамен жалғанатын жердегі дәнекерлеу жігі сапасыз болуы мүмкін. Төтенше жағдайда жік сөгіліп, жүргізуші артқы дөңгелектерді басқара алмай қалады. Кері шақыру туралы хабарламаны Қытайдың Нарықты реттеу жөніндегі мемлекеттік басқармасы (SAMR) жариялады.
Бұл жаңалық Малайзиядағы тағы бір оқиғамен тұспа-тұс келді. 7 қарашада Chery Tiggo Cross кроссовері NKVE автомагистралінде Perodua Myvi хэтчбегімен соқтығысып, екі дөңгелегінен айырылды. Малайзиялық Paul Tan басылымының хабарлауынша, Chery Auto Malaysia дөңгелектер мен алдыңғы бамперді бөлшектің ақауы емес, соққы зақымдады деп мәлімдеді. Chery-дің тағы бір маркасы Jaecoo да осындай түсінік берген: 4 қарашада оның J5 электр кроссовері Джакартада жиек тас пен қоршауға соғылып, дөңгелегінен айырылған еді. Бұл апаттардың артқы ось ақауымен байланысы әзірге анықталған жоқ.
Қытайдағы кері шақыру 27 қарашада басталады. Сервис артқы осьтегі шығарылған күн кодын тексеріп, бөлшек ақаулы партиядан болса, оны тегін ауыстырады. Көлік иелеріне SMS және тапсырысты хат арқылы хабарлайды. Ақау 53 882 көліктің бәрінде бола бермеуі мүмкін: реттеуші қанша осьті ауыстыру керегін нақтыламады. Кері шақыру басқа елдерде сатылған көліктерге де қатысты ма — Chery бұл туралы хабарлаған жоқ. Қытайдан тыс жерлерде Tiggo 5x көбіне Tiggo 4 және Tiggo 4 Pro, ал Omoda 5 Omoda C5 деген атпен сатылады.
Chery-дің артқы осіне қатысты мәселе Малайзиядан басталды. 6 қазанда онда Omoda 5 жүріп келе жатқанда артқы осі ажырап кетті. Елдің көлік ведомствосы (JPJ) бензин қозғалтқышы бар, рестайлингке дейінгі жаңа Omoda 5 көліктерін тіркеуді тоқтата тұрды. Chery 8 878 Omoda 5 көлігін тексеріп, бөлшектерін ауыстыратынын жариялады, ал компания төрағасы Инь Тунъюэ Малайзия билігінен кешірім сұрады. 2024 жылы да сол елде дәнекерлеуге қатысты ұқсас ақауға байланысты 600 Omoda 5 кері шақырылған.
Малайзиядағы оқиғадан кейін Omoda-ның Ресейдегі кеңсесі ол елде Omoda C5 көліктерінің артқы осіне қатысты бірде-бір жағдай тіркелмегенін мәлімдеді, ал Chery басқа экспорттық нарықтарға арналған көліктердің артқы аспасын тексеруге уәде берді. Omoda мен Jaecoo Қазақстанда да сатылады, ал бұл маркаларды елде 2028 жылға дейін шығару жоспарланып отыр.
