Jaguar Land Rover (JLR) компаниясы BYD Land Rover Defender көлігін бөлшектеп, оның кейбір технологияларын Ti7 гибрид жол талғамайтын көлігіне пайдаланған деп күдіктенеді. Дау Гаагадағы сотқа жетті: алдын ала отырыс 11 қарашаға белгіленген. Бұл туралы Ұлыбританияның The Guardian және The Times газеттері хабарлады.
Тамызда сот шешімімен сот орындаушылары BYD-дің Нидерландыдағы екі кеңсесінен — Схидам мен Хофддорптан — цифрлық құжаттарды алып қойды: JLR жазбалар жойылып кетпеуі үшін осыны талап еткен. BYD заңгерлері мұны «балық аулау экспедициясы», яғни дәлелді кездейсоқ іздеу деп атап, тым көп файл алынғанын мәлімдеді. Ал JLR кеңесшілері қытайлық тарапты процеске кедергі келтіріп отыр деп айыптады. Британ БАҚ-тарының деректерінше, мәселе Ti7-нің сыртқы түрінде ғана емес, технологияның көшірілуі мүмкін екенінде. JLR жүріп жатқан сот талқылауларына пікір білдірмейтінін айтты, BYD те пікір білдіруден бас тартты.
Ti7 — шанағы шаршы пішінді, жеті орындық қосылатын гибрид. Қытайда ол 2025 жылғы қыркүйектен бері Fangchengbao маркасымен сатылады. Британ салондарына көлік қарашада түседі, ал тұтынушыларға қаңтардан бастап беріле бастайды. Британ нұсқасының қуаты — 402 ат күші, 35,6 кВт·сағ аккумуляторы электрмен 119 км-ге дейін жүруге мүмкіндік береді. Алдын ала тапсырыс бағасы 47 995 фунттан (шамамен 29 млн теңге) басталады — бұл 68 465 фунт (шамамен 41 млн теңге) тұратын жеті орындық Defender 110-нан шамамен 20 мың фунт арзан. Екі көліктің қозғалтқыш жүйесі мен құрылымы әртүрлі.
JLR бұған дейін де осындай дауда жеңген: 2019 жылы үш жылға созылған талқылаудан кейін сот Range Rover Evoque-ты көшірген модель шығарған қытайлық Jiangling Motors-қа қарсы істе JLR-дің жағына шықты. Сонымен бірге JLR-дің тағы бір қытайлық автоөндіруші Chery-мен бірлескен кәсіпорны бар, ол Freelander атауын электрокөлік маркасы ретінде қайта жаңғыртты. Ал британдықтар «Temu-дағы Range Rover» деп атап кеткен Chery-дің Jaecoo 7 кроссовері қазанда Ұлыбританиядағы ең көп сатылған көлік атанды — 3 412 дана.
