8 қарашада Талдықорғанда тоғыз қабатты тұрғын үйдің сегізінші және тоғызыншы қабаттарындағы балкондар өртенді. ТЖМ хабарлауынша, өрт сөндірушілер жеті адамды, оның ішінде екі баланы құтқарды. Ешкім зардап шеккен жоқ.
Өрт туралы хабар 112 нөміріне түскен. Тағы 35 тұрғын, оның ішінде 11 бала, үйден өздері шығып үлгерді. Өрт шамамен 23,5 шаршы метр аумақты шарпыды. Өрт толық сөндірілді, оның шығу себебі анықталып жатыр.
Өрт сөндірушілердің балкондардағы өртті қалай сөндіргенін ТЖМ көрсетті:
Құтқарушылар еске салады: от не түтін байқасаңыз, бірден 112-ге хабарласыңыз. Көпқабатты үй тұрғындары мына жайттарды да есте ұстағаны жөн:
- өрт кезінде лифтіге мінбеңіз, баспалдақпен түсіңіз, балалар мен қарттарды бірінші шығарыңыз;
- балконды қоқысқа толтырмаңыз: ескі жиһаз, қорап пен шүберек тез тұтанады, ал балкондағы от жоғарғы қабаттарға оңай өтеді;
- балконнан темекі тұқылын тастамаңыз — ол төменгі қабаттағы балконды өртеп жіберуі мүмкін;
- кіреберісті қою түтін басып қалса, үйде қалған қауіпсіз: есікті жауып, саңылауларды дымқыл матамен бітеңіз де, өрт сөндірушілерді терезе алдында күтіңіз.
Сол күні елордада да өрт болды: түнде Астанада жанып жатқан алты қабатты үйден 25 адам құтқарылды, олардың жетеуі — бала. Ал қыркүйекте Алматыдағы Самал-2 шағынауданындағы 12 қабатты үйде шыққан өртте құтқарушылар 10 адамды алып шықты, тағы 72 тұрғын эвакуацияланды.
