Қазақстандық әнші әрі композитор Кирилл Ли 7 қарашада Алматыда дүниеден өтті. Оның «Карина», «Дождь» және «Милашка-малолетка» әндері 90-жылдары хитке айналған еді. Әншінің қазасын Мәжілістің бұрынғы депутаты Тәңірберген Бердоңғар Instagram парақшасында хабарлады.
«90-жылдары бүкіл Алма-Ата осы дауысқа билейтін. «Карина», «Дождь», «Милашка-малолетка» – біздің жастығымыз еді», – деп жазды Бердоңғар. Оның айтуынша, Кирилл Лиді «қазақстан сахнасының генералы» деп атаған. Әнші бәріне өз күшімен жеткен: «Бәрін өз қолымен, ешкімге арқа сүйемей жасады».
Бердоңғар әншінің бір сұхбатта айтқан басты кеңесін де еске алды: «Жұмыс істеу керек, жұмыс, жұмыс». «Біз, алматылықтар үшін бұл – тұтас бір дәуір. Дарынды, алғашқылардың бірі еді. Жатқан жері жайлы болсын», – деп аяқтады ол жазбасын.
Тәңірберген Бердоңғардың Кирилл Ли туралы жазбасы:
Қазаның себебі мен қоштасу рәсімінің уақыты әзірге айтылған жоқ.
Кирилл Лидің сахнаға жолы ұзаққа созылды. Бала кезінде ол барабан ойнауды армандаған, бірақ Пионерлер сарайына қабылданбаған. Бас-гитарада ойнауды алғаш әскерде үйренді: Мәскеудегі әскери театрға түсіп, сонда Гнесиндер атындағы оқу орнының музыканттарымен танысты. Кейін музыка училищесін контрабас сыныбы бойынша бітірді. Мейрамханаларда ойнап, Кавказ бен Украинаны гастрольмен аралады, Грозный филармониясында жұмыс істеді.
Елге оралған соң ол өзі ән айта бастады. Әндерді досы, клавишник Алексей Миненкомен бірге жазды. Тыңдармандар «Карина» мен «Дождьтан» бөлек, оның «Повстречал я тебя», «Десятиклассница» және «Алма-Ата» әндерін де жақсы біледі.
Әншінің даңқы 90-жылдар мен 2000-жылдардың басында шықты. 2002 жылдан бастап ол теледидарда сирек көрінді. Кейін денсаулығына байланысты сахнадан кетіп, жарнама мен продюсерлік салада жұмыс істеді, бірақ ән жазуды қоймады. Әйелі де онымен бірге сахнаға шығып жүрген.
