Алматыда Наталия Сац атындағы Мемлекеттік академиялық орыс балалар мен жасөспірімдер театры реконструкциядан кейін қайта ашылды. Жаңарған ғимаратта 6–8 қараша аралығында алғашқы қойылымдар көрсетілуде. Ал 7 қарашада театр «САЦ. Возвращение домой» («Үйге оралу») гала-қойылымын ұсынды: ұжым осылайша театрдың 81 жылдығын және төл сахнасына оралуын атап өтті.
1981 жылы салынған тарихи ғимарат бұрынғы келбетін сақтап қалды. Бұрын мұнда Алма-Ата мақта-мата комбинатының мәдениет үйі орналасқан. Реставраторлар мозаиканы, мәрмәрмен әрленген бөліктерді және интерьердің басқа да элементтерін қалпына келтірді. Техника толықтай дерлік жаңартылды: инженерлік желілер, жарық, дыбыс және сахна жабдықтары ауыстырылды.
«Енді бәрі халықаралық стандартқа сай», – деді театр директорының орынбасары Анна Кузембаева. Режиссер Владимир Крылов мұндай тамаша жағдайда бұрын-соңды жұмыс істемегенін айтты.
Тарихи ғимараттың жанына жаңа корпус салынып, театрдың аумағы 9 мыңнан 25 мың шаршы метрге дейін ұлғайды. Мұнда 1986–2005 жылдары театрды басқарған Борис Преображенский атындағы 260 орындық Black Box камералық сахнасы пайда болды. Ондағы сахна мен көрермен орындарын әр қойылымға қарай түрліше орналастыруға болады. Корпуста сондай-ақ репетиция залдары, балет сыныбы, шеберханалар, Book Hall, ең кішкентай көрермендерге арналған Baby Hall және Sats ComUnity балалар студиясының оқу театры бар. Театр директоры Олег Гостевтің айтуынша, бұл – елімізде туғаннан бастап балаларға арналған беби-қойылымдар желісін іске қосқан жалғыз театр.
«Хабар 24» арнасының театрдың ашылуы туралы сюжеті:
Ашылу афишасында камералық сахнада Владимир Крыловтың «Страсти по Шекспиру» комедиясының премьерасы бар. Қойылым Шекспир заманындағы кезбе труппа туралы баяндайды. Ал тарихи сахнада Шарль Перроның ертегісі бойынша «Кот в сапогах» («Етікті мысық») музыкалық ертегісі көрсетіледі.
Реконструкция 2025 жылғы ақпанда басталған, жоба 24 млрд теңгеге бағаланған еді. Тамыз айында ТЮЗ ғимаратындағы жұмыстар аяқталуға жақын қалғаны хабарланған.
