Олимпиада чемпионы Михаил Шайдоров ISU Гран-при сериясының үшінші кезеңі — Cup of China жарысында бесінші орын алды. Шэньчжэньде өткен турнир 8 қарашада аяқталды. Қазақстандық мәнерлеп сырғанаушы екі бағдарлама бойынша 263,49 ұпай жинап, жүлдесіз қалды.
Шайдоров ерікті бағдарламада 168,62 ұпай алды: техника үшін — 88,71, компоненттер үшін — 79,91. Бұл 12 қатысушы арасындағы күннің алтыншы нәтижесі. Ол төрт айналымды флипті таза орындады, бірақ басқа күрделі секірулерде қателесті. Төрешілер төрт айналымды лутцтың толық айналмағанын белгілеп, екі төрт айналымды секіруден тұратын каскадтың бағасын төмендетті. Қысқа бағдарламада да ол 94,87 ұпаймен бесінші болған еді. Сонда спортшы алғашқы төрт айналымды лутцтан кейін мұзға тұрақты қона алмады.
Жапониялық Као Миура 293,25 ұпаймен жеңіске жетті. Күміс жүлде Владислав Дикиджиге (282,44), қола Евгений Семененкоға (281,62) бұйырды. Екі ресейлік спортшы да бейтарап мәртебемен өнер көрсетеді. Төртінші орынды жапониялық Сюн Сато иеленді (277,20).
Гран-при сериясы — ISU-дің маусымдағы басты халықаралық жарыстар топтамасы. Оның қорытындысы бойынша әр сайыс түрінен үздік алты спортшы желтоқсандағы финалға жолдама алады.
Бұл — Шайдоровтың осы маусымдағы екінші Гран-при кезеңі. Францияның Анже қаласындағы Гран-приде ол 206,55 ұпаймен оныншы орынға тұрақтаған. Серия басталар алдында қазақстандық Братиславадағы Непела мемориалында қола жүлде алды. Бұл оның Олимпиададан кейінгі алғашқы турнирі еді. Шэньчжэньдегі кезеңде ол бұған дейін екі рет тұғырға көтерілген: 2024 жылы екінші, 2025 жылы үшінші болды.
22 жастағы алматылық спортшы ақпанда Милан мен Кортина-д’Ампеццода өткен Олимпиада ойындарында жеңіп, Қазақстан тарихындағы мәнерлеп сырғанаудан тұңғыш Олимпиада чемпионы атанды. Бұған дейін ол 2025 жылғы әлем чемпионатында күміс жүлде алып, сол маусымда Төрт құрлық чемпионатында топ жарған.
