Ресей әскері 7 қарашаның кеш мезгілінде Украинаның оңтүстігіндегі, Қара теңіз жағалауындағы ең ірі порт – Одессаға шабуыл жасады. Соққы қалалық инфрақұрылымға тиіп, бір адам қаза тапты. Бұл туралы Одесса қалалық әскери әкімшілігінің басшысы Сергей Лысак хабарлады. Бірнеше сағаттан кейін, 8 қарашаға қараған түні басқыншылар қаланы тағы атқылады: аудандардың бірінде тұрғын емес ғимарат өртенді.
Одессада әуе шабуылы дабылы Киев уақытымен шамамен сағат 22:35-те (Астана уақытымен 01:35-те) жарияланды, одан кейін қалада жарылыс естілді. Украина БАҚ-тарының хабарлауынша, қалаға шабуылдаушы дрондар жіберілген. «Жау Одессаға тағы шабуыл жасады. Инфрақұрылым зардап шекті», – деп жазды Лысак өзінің Telegram-арнасында. Кейін ол бір адамның қаза тапқанын хабарлап, марқұмның туған-туыстары мен жақындарына көңіл айтты. Қаза тапқан адамның аты-жөні, жасы және кәсібі әзірге айтылған жоқ. Ресей дрондары нақты қандай нысанға тигені ресми түрде нақтыланбады.
Түнде Ресей шабуылды қайталады. Лысактың мәліметінше, соққыдан кейін Одессаның бір ауданында тұрғын емес ғимаратта өрт шықты, жарылыс толқынынан көршілес тұрғын үйдің терезелері шағылды. Оқиға орындарында төтенше қызметтер жұмыс істеді. Киев уақытымен сағат 03:20-дағы (Астана уақытымен 06:20) алдын ала деректер бойынша, түнгі соққыдан зардап шеккендер туралы хабарланған жоқ.
Бұл – бір тәулік ішінде Одесса мен облысқа жасалған үшінші шабуыл. 7 қарашада күндіз ресейлік дрон қаладағы шаруашылық құрылысына тиіп, ол өртенді. Украина ТЖҚ-ның Одесса облысындағы басқармасының мәліметінше, бір тұрғын үй ішінара қирап, өртенген, жарылыс толқыны төрт қабатты кеңсе ғимаратының терезелерін шағып кеткен, ол жолы ешкім зардап шекпеген. Одесса облыстық әскери әкімшілігінің басшысы Олег Кипердің айтуынша, тағы бір дрон облыстың солтүстігіндегі жеке үйге құлаған: қирау ауқымды, шаруашылық құрылысы өртенген.
Бейбіт қалалардағы тұрғын үйлер мен қалалық инфрақұрылымға соққы беру – Ресей соғыс басынан бері Украинаға қарсы қолданып келе жатқан лаңкестік тәсіл. Халықаралық гуманитарлық құқық азаматтық нысандарға шабуыл жасауға тыйым салады, ал украин тарапы мұндай соққыларды әскери қылмыс ретінде тергейді.
Одесса – Ресей толық ауқымды басқыншылықтың алғашқы айларынан бері үздіксіз соққы беріп келе жатқан қалалардың бірі: порт, қоймалар, энергетика нысандары мен тұрғын кварталдар жиі атқыланады. Жаңа шабуыл Ресей Украинаға баллистикалық зымырандармен ең ірі соққылардың бірін жасаған тәулікке тұспа-тұс келді: 36 баллистикалық зымыранның тек төртеуін ғана украин әуе қорғанысы құлата алды, ал Днепрде энергетика нысандарына соққыдан кейін 60 мыңнан астам тұтынушы жарықсыз қалды.
