Stadler жаңа вагондарынан құралған алғашқы жолаушылар пойызы 11 қарашада сағат 13:10-да Астанадағы «Нұрлы жол» вокзалынан Алматыға аттанды. Жыл соңына дейін мұндай құрамдар елордадан тағы екі бағытқа – Атырау мен Қызылордаға жіберіледі. Бұл туралы «ҚТЖ» ҰК АҚ басқарма төрағасының орынбасары Ануар Ахметжанов пойызды іске қосу рәсімінде айтты.
Вагондарды кешіктіріп жеткізгені үшін зауыт өтемақы төлейді. «Келісімге қол жеткіздік, келісімшарт талаптарына сәйкес өтемақы төленеді», – деді Ахметжанов. Ол коммерциялық құпияны алға тартып, соманы атамады: өтемақы шарттары «ҚТЖ» мен Stadler арасындағы келісімшартта жазылған. Алғашқы вагондар «Жолаушылар тасымалы» АҚ-ға 2025 жылғы желтоқсанда берілуге тиіс еді, ал қыркүйекте Көлік министрлігі оларды қазанның соңында іске қосамыз деп уәде еткен. «ҚТЖ» кешігуді Швейцария мен Қазақстан стандарттарының айырмашылығымен, құрылымды баптаумен және техникалық ақаулармен түсіндірген. Маусымда Премьер-министр Олжас Бектенов жеткізуді жеделдетуді талап етті.
№ 3/4 «Нұрлы жол – Алматы-2» пойызы күн сайын қатынайды: Астанадан сағат 13:10-да шығып, Алматыға келесі күні сағат 08:30-да жетеді. 13 қарашада жаңа вагондар «Нұрлы жол – Семей» бағытына шығады. Астана – Атырау пойызы қараша аяқталмай-ақ жүруі мүмкін, ал Жезқазған арқылы өтетін «Нұрлы жол – Қызылорда» пойызын жаңа кесте енгізілген кезде, «шамамен желтоқсанның ортасында» іске қосу жоспарланып отыр. Билеттер bilet.railways.kz сайтында және вокзал кассаларында сатылады, сату 5 қарашада басталған.
Қазір «Жолаушылар тасымалында» Stadler-дің 100-ден астам вагоны бар, ал келісімшарт бойынша 2030 жылға дейін барлығы 557 вагон жеткізілуге тиіс. «Бұл өңірлер бойынша кезең-кезеңімен жүзеге асады», – деп түсіндірді Ахметжанов. Оның айтуынша, 2030 жылы мұндай вагондар іс жүзінде барлық бағытта қатынайды.
Вагондар Stadler Kazakhstan зауытында құрастырылады. «ҚТЖ» мәліметінше, олар -50 градустан +45 градусқа дейінгі температураға төтеп береді, қызмет ету мерзімі – 40 жыл. Купе вагонында 40 орын, плацкарт вагонында 58 орын бар. Вагондарда климат-бақылау, 220 В розеткалар, USB және USB-C ұяшықтары, Wi-Fi, бейнебақылау, жүк қоятын орын және мүмкіндігі шектеулі жолаушыларға арналған жағдай қарастырылған, ал құрамда вагон-буфет жүреді.
Жаңа вагондарды басқа пойыздар да алып жатыр: жуырда Wi-Fi пен сейфі бар отандық құрастырылған вагондар Маңғыстау – Семей бағытына шықты.
