Денсаулық сақтау министрлігі Ұлттық статистика бюросының (ҰСБ) дерегімен келіспеді. Бюро мәліметінше, Қазақстанда дәрі-дәрмек бір жылда 20,9%-ға қымбаттаған. Министрліктің есебі бойынша, ол бақылайтын препараттардың шамамен 78%-ының бағасы өспеген: 1595 атаудың бағасы бұрынғы деңгейде қалған, ал 799 атау арзандаған.
Сандардың айырмашылығы есептеу тәсілінің әртүрлі болуынан туындап отыр. Статистиктер 33 дәріден тұратын іріктемені алады, олардың көбі рецептсіз сатылады. Сонымен қатар дәрінің дозасы, концентрациясы, шығарылу түрі мен қаптамасының көлемі ескерілмейді. Сондықтан министрлік мұндай индексті дәрінің қолжетімділігін бағалайтын жалғыз көрсеткіш ретінде қолдануға болмайды деп есептейді. Министрліктің өзі цифрлық таңбалау жүйесіне сүйенеді: әр қаптаманың өз коды бар, ал жүйе бөлшек сауда чектерін нақты уақытқа жуық режимде көріп отырады. Қазір бұл жүйеде дәрінің 3073 атауы бар.
Министрлік мәлімдемесін өзінің Telegram-арнасында жариялады:
Ведомство алыпсатарлық үстеме бағаға жол бермеу үшін дәрі-дәрмектің қозғалысын қадағалап, барлық өңірдегі бағаны бақылап отырғанын да айтты. Сатып алушы препаратты өзі де тексере алады: Naqty Onim қосымшасында дәрінің шекті бөлшек сауда бағасы, өндірушісі және тіркелгені туралы мәлімет көрсетіледі. Бағаны асырып сатқан жағдайда сол қосымша арқылы шағым түсіруге болады. Кез келген дәріні қабылдамас бұрын дәрігермен кеңесіңіз.
Министрлік ҰСБ деректерімен алшақтық туралы бірінші рет айтып отырған жоқ. 3 қарашада денсаулық сақтау министрі Ақмарал Әлназарова мұны әртүрлі әдістемемен түсіндірген еді. Ол бюро мамандары таңбалау жүйесіне қол жеткізіп, кез келген өңірдегі кез келген дәріні онлайн бақылай алатынын айтқан. Ал 2027 жылдан бастап министрлік дәріханалар мен интернеттегі дәрі сатылымын қатаң тексермек.
