Тележүргізуші, әл-Фараби атындағы ҚазҰУ оқытушысы Анна Данченко «Құрмет» орденімен марапатталды. Марапатты оған 10 қарашада Президент Қасым-Жомарт Тоқаев тапсырды. Анна орденді өмірден озған ата-анасына арнайтынын Instagram парақшасында жазды.
Данченко бұл марапатты ең алдымен сүйікті әкесі мен анасына арнайтынын айтты. «Менің әрбір жетістігімнің артында олардың ақ батасы, маған деген сенімі мен шексіз махаббаты жатыр», — деп жазды ол. Аннаның әкесі 2022 жылы қайтыс болған, ал анасынан осы күзде айырылды — тележүргізуші бұл қаза туралы қыркүйектің соңында айтқан еді. Ол марапаттың әке-шешесі үшін екенін айтып, оларға тікелей үн қатты.
Данченко бұл орденді қазақы ортада алған тәрбиесінің және қазақ тіліне деген құрметінің нәтижесі деп санайды. «Қазақ тілі мен үшін тек қарым-қатынас құралы емес», — деп жазды ол. Тележүргізуші тілді өз болмысы, жүрегінің үні және өмірлік таңдауы деп атады. Жазбаның астында оны оқырмандары мен шоу-бизнестегі әріптестері құттықтады.
Анна Данченконың марапат туралы жазбасы:
Осы орденге тағы үш адам ие болды: Қорғаныс министрлігі Орталық ансамблінің солисі Эльдана Габерман, А. Байтұрсынұлы атындағы Тіл білімі институтының бас ғылыми қызметкерлері Жамал Манкеева мен Қыздархан Рысберген. «Қазақ тілі» қоғамының вице-президенті Шерубай Құрманбайұлы «Қазақстанның еңбек сіңірген қайраткері» атағын алды, ал қоғамның орталық кеңесінің мүшесі Сауытбек Абдрахманов «Ел бірлігі» орденімен марапатталды. Сол күні Астанада «Қазақ тілі» қоғамының Х құрылтайы өтіп, онда Тоқаев қазақ тілінің барлық сөздігін жаңартуды тапсырды.
Анна Данченко Қызылорда облысының Арал қаласында туған. Қазақ тілін бала кезінен үйренген: алғашқы ұстаздары балалық шақтағы достары болған, мектепте тілден олимпиадаларға қатысып, домбыра тартуды үйренген. Бакалавриатты, магистратураны және докторантураны қазақ тілінде оқыған, докторантураны Абылай хан атындағы Қазақ халықаралық қатынастар және әлем тілдері университетінде бітірген. Ақтөбедегі өңірлік телеарнада, 31 арнада және НТК-да жұмыс істеген, ҚазҰУ-дың журналистика және филология факультеттерінде сабақ береді.
