Қаржылық мониторинг агенттігінің (ҚМА) Солтүстік Қазақстан облысы бойынша департаменті Петропавлдағы «Қызылжар» футбол клубының бұрынғы президенті Григорий Лорияны мемлекетаралық іздеуге жариялады. Ол бюджет қаражатын ұрлап, салық төлеуден жалтарды деп күдіктеледі, жалпы сома 414 млн теңгеден асады. Енді 72 жастағы Лорияны Қазақстанда ғана емес, елден тыс жерлерде де іздейді.
Ведомство мәліметінше, 2023 жылы клубты ұстауға жергілікті бюджеттен 1,7 млрд теңге бөлінген. Тергеу Лория бас бухгалтермен және басқа да адамдармен бірлесіп жалған қаржы құжаттарын пайдаланды, ақшаны жеке шоттарға негізсіз аударып отырды деп есептейді. ҚМА нұсқасы бойынша, бухгалтерлік және салық есептілігіне жалған мәлімет енгізілген: декларацияларда қызметкерлердің табысы, еңбекақы қоры және клубтың жылдық жиынтық табысы азайтып көрсетілген.
ҚМА Лорияның қайда жүргенін білетіндерді ведомствоның кезекші бөліміне +7 7172 70 84 78 нөмірі арқылы немесе 1458 call-орталығына хабарласуға шақырады.
Бұған дейін, 7 қарашада, Лорияға қатысты іздеу ісі қозғалған, ал оның іздеуге жарияланғаны келесі күні Бас прокуратураның құқықтық статистика порталындағы деректерден белгілі болды. Ол кезде залал сомасы айтылмаған. Оған дейін клубтың бұрынғы президенті шақыруға екі рет келмеген: 5 қарашада өзіне күдік жариялануға тиіс болған экономикалық тергеу департаментіне, 6 қарашада сырттай қамауға алу туралы өтінішхатты қараған Петропавлдың мамандандырылған тергеу сотына бармаған. Лорияға сеніп тапсырылған мүлікті аса ірі мөлшерде иемденіп алу немесе ысырап ету және салық төлеуден жалтару баптары бойынша күдік келтірілген. Солардың біріншісі мүлкі тәркіленіп, 7 жылдан 12 жылға дейін бас бостандығынан айыруды көздейді.
Григорий Лория «Қызылжарды» 2014 жылдан 2024 жылдың наурызына дейін басқарған. Клубтағы ұрлық 2024 жылы анықталды, кейін бұрынғы президентке қатысты материалдар жеке іс жүргізуге бөлінді. Негізгі іс бойынша 2026 жылғы қаңтарда сот клубтың бұрынғы бас бухгалтері Ольга Замелацкаяны 7,5 жылға бас бостандығынан айырды. Одан клуб пайдасына 70 млн теңге, мемлекеттік кірістер органдары пайдасына 287 млн теңге өндіріліп алынды.
