Генетик Мақсат Жабағин халықаралық USERN Prize сыйлығын алған тұңғыш қазақстандық атанды. Биология ғылымдары саласындағы марапат оған 10 қарашада Астанада табысталды. Бұл туралы Қазақстан Республикасы Ұлттық ғылым академиясы хабарлады.
Жабағин – PhD, профессор, Ұлттық биотехнология орталығының адам генетикасы зертханасын басқарады. Ол Қазақстан мен Орталық Азия халқының генетикалық әртүрлілігін және оның қалай қалыптасқанын зерттейді. Жұмысында әке тарапынан берілетін генетикалық желілер мен ежелгі ДНҚ-ны пайдаланады, ал генетика деректерін шежіремен салыстырады. Осылайша оның зерттеулерінде генетика, археология және тарих тоғысады.
Бәсеке оңай болған жоқ. Сыйлыққа мыңға жуық ғалым ұсынылды, комитет 521 өтінімді іріктеп алды, ал қысқа тізімге 96 адам енді. Биология ғылымдары бойынша финалға бес адам шықты: италиялық Луиджи Розати, америкалық Суйхун Лю мен Сыюань Дин, ирандық Рудабе Бахрамсолтани және Жабағин.
«Қазақстанды халықаралық ғылыми аренада таныстырып, елімізді ғылыми жетістіктермен дәріптеу – мен үшін үлкен мәртебе», – деді ғалым. Ол бұл жеңіс қазақстандық жас зерттеушілерді өз идеяларын дамытып, халықаралық деңгейге батыл шығуға шабыттандырады деп үміттенеді. Жабағиннің айтуынша, ежелгі ДНҚ мен қазіргі геномдарды зерттеу нәтижелері дербестендірілген геномдық медицинаның негізіне айналуы мүмкін.
USERN Prize сыйлығы 2016 жылдан бері ғылымға елеулі үлес қосқан 40 жасқа толмаған ғалымдарға беріледі, лауреаттар бес ғылым саласы бойынша анықталады. Сыйлықты USERN (Universal Scientific Education and Research Network) халықаралық желісі тағайындайды. Астанадағы рәсім 8–10 қараша аралығында Youth Earn Vision ұранымен өткен USERN XI халықаралық конгресін қорытындылады. Марапаттау дәстүр бойынша Бейбітшілік пен даму жолындағы дүниежүзілік ғылым күніне орайластырылады.
