Қазақстандағы жалға берушілер 2016 жылы экономиканың баяулағанына қарамастан бағаны көтерді. Өндірістік үй-жайлардың жалдау ақысы 3%-ға, кеңселердікі 2%-ға, сауда алаңдарынікі 1,3%-ға қымбаттады. Жалпы алғанда жылжымайтын мүлікті жалға беру және пайдалану қызметтері 2015 жылмен салыстырғанда 1,5%-ға қымбаттағанын Finprom талдау қызметі есептеп шығарды.
Әкімшілік шығындар, әсіресе жалдау ақысы, кәсіпорындардың іскерлік белсенділігіне кері әсер етіп отыр, ал бизнестің табысы жалпы азайып барады.
Өндірісшілер бәрінен көп зардап шекті. 2015 жылы олар үшін жалдау ақысы 2,3%-ға өскен, тараптар келісіп отыра алатын, ал 2016 жылы жалға берушілер «жіберіп алғанын қуып жетуге бел буды».
Девелоперлер қазақстандықтардың нақты табысы азайғанын ескерді, сондықтан сауда үй-жайлары мен тұрмыстық қызмет көрсету орындарының жалдау ақысы 1,3%-дан аспай қымбаттады. Мейрамханалар, кафелер мен кеңселер үшін баға көбірек – 2–2,5%-ға өсті.
2016 жылы экономиканың өсуі дағдарыстан кейінгі бүкіл кезеңдегі ең төменгі деңгейге дейін баяулады. ЖІӨ бір жыл бұрынғы 1,2%-ға қарсы 1%-ға өсті. Тауар өндірісі 1,3%-ға, қызмет көрсету небәрі 0,8%-ға артты. Құрылысқа, күрделі жөндеуге, машиналар мен жабдыққа жұмсалған шығынның нақты көлемі 5,1%-ға ұлғайды (2015 жылы – 3,7%), ал негізгі капиталға салынған инвестиция 7,7 трлн теңге деп бағаланады.
Өндірушілер арнайы экономикалық аймақтарда жағдайды жеңілдете алады. Қазақстанда 2001 жылдан бері жұмыс істейтін 10 АЭА бар. Барлық АЭА қатысушылары корпоративтік табыс салығынан, жер салығы мен мүлік салығынан босатылған, ал үкімет бекіткен тізбе бойынша аймақ қызметінде толық тұтынылатын тауарларға ҚҚС нөлдік мөлшерлемемен салынады. «Инновациялық технологиялар паркі» және «Астана – жаңа қала» АЭА-ларында қосымша жеңілдіктер бар.
«Радиоточка» материалдары бойынша.
