Алматыда қалалық жол инфрақұрылымын дамыту басқармасы жолды қайта жаңарту жобасының жобалық-сметалық құжаттамасы үшін мердігерге 202 млн теңге төлегені бойынша тергеу басталды. Құжаттама мемлекеттік сараптамадан өтпеген, сондықтан ол бойынша ештеңе салу мүмкін емес. Бұл туралы 10 қарашада Алматы қаласының прокуратурасы хабарлады.
Прокурорлар анықтаған заң бұзушылық мұнымен шектелмейді. «Сонымен қатар тапсырыс беруші 27 млн теңге көлеміндегі тұрақсыздық айыбы мен шарттың орындалуын қамтамасыз етуді өндіріп алмаған», — делінген прокуратура хабарламасында.
Сотқа дейінгі тергеу Қылмыстық кодекстің 361-бабы — лауазымдық өкілеттіктерді теріс пайдалану бойынша басталды. Істі Алматы қаласы бойынша ҰҚК департаментінің сыбайлас жемқорлыққа қарсы қызметі тергеп жатыр. Қай жолды қайта жаңарту жоспарланғаны, мердігердің кім екені және күдіктілердің бар-жоғы нақтыланбады: өзге мәліметтер тергеу мүддесі үшін жария етілмейді.
Жолға бөлінген қаражат бұған дейін де қылмыстық істерге себеп болған. СҚО-да Тимирязев – Докучаев жолын жөндеу кезінде 87 млн теңгені жымқырды деген іс бойынша мердігер компанияның бұрынғы басшысы қамалды — бұл іс аса ірі мөлшердегі алаяқтық ретінде тергеліп жатыр. Ал Жетісу облысында Алматы – Өскемен тасжолын жөндеу кезінде тас пен топырақты заңсыз өндіргені үшін іс қозғалды, залал 115 млн теңгеден асады деп бағаланды.
