Анатолий Цой шұғыл түрде ауруханаға жатқызылғаны туралы хабардан кейін жанкүйерлеріне бейнеүндеу жасады. Әнші Қытайдағы ауруханада жатқанын растап, өзін жақсы сезінетінін айтты. Бейнежазбаны ол 10 қарашада Instagram-да жариялады.
«Шынымды айтсам, қазір өзімді өте жақсы сезінемін. Бірақ мен расымен Қытайдағы ауруханадамын», — деді Цой. Оның айтуынша, емдеу жоспарын қытайлық және ресейлік дәрігерлер құрған. «Бәрі жоспар бойынша, бәрі жақсы. Бір-екі күннен кейін жап-жаңадай боламын», — деді әнші. Соңында ол жанкүйерлеріне қолдау көрсеткені үшін алғыс айтып: «Өздеріңізді, денсаулықтарыңызды күтіңіздер, бақытты болыңыздар», — деп тіледі.
Анатолий Цойдың Instagram-дағы бейнеүндеуі:
Цойдың Қытайда шұғыл түрде ауруханаға жатқызылғанын бір күн бұрын 112 Telegram-арнасы мен РЕН ТВ хабарлаған. Олардың мәліметінше, әншінің құрсақ қуысында қатты қабыну анықталған, ал денсаулығына қатысты мәселелер қазан айының соңында, Түркиядағы гастроль кезінде басталған. Қай қаладағы, қандай клиникада жатқанын және диагнозын әнші бейнежазбада айтпады.
Анатолий Цой 1989 жылы Талдықорғанда туған. Ол қазақстандық «Х-Фактор» жобасының финалына дейін жетті, 2014 жылы «Хочу к Меладзе» шоуынан кейін MBAND тобының құрамына енді, кейін жеке мансабын бастады. 2020 жылы әнші «Маска» шоуында жеңіске жетті.
