Қазақстандық теннисші Александр Шевченко Стокгольмдегі ATP 250 санатындағы турнирдің екінші айналымына шықты. 10 қарашада алғашқы кездесуінде ол француз Адриан Маннариноны 6:1, 6:3 есебімен жеңді.
Кездесу 1 сағат 10 минутқа созылды. ATP рейтингінде Шевченко 107-орында, Маннарино 61-орында тұр. Қазақстандық теннисші негізгі торға іріктеу кезеңі арқылы өтті: онда ол Виктор Дурашовичті (6:1, 6:1) және британдық Джейкоб Фернлиді (6:2, 6:4) ұтты.
Екінші айналымда Шевченко норвегиялық Каспер Руудпен кездеседі. Рууд – әлемнің 18-ракеткасы, турнирдің екінші нөмірлі ойыншысы әрі қазіргі чемпионы, ол бірінші айналымда ойнаған жоқ. Стокгольм турнирі жабық кортта өтеді, жүлде қоры – 723 435 еуро.
Шевченко 25 жаста. Ол 2024 жылдың қаңтарынан бері Қазақстан атынан өнер көрсетеді, бұған дейін Ресей намысын қорғаған. Рейтингтегі ең жоғары көрсеткіші – 45-орын, оған 2024 жылғы ақпанда көтерілген. ATP деңгейіндегі жалғыз финалын 2023 жылы Мец қаласында ойнаған. Қыркүйекте Шевченко Астанада Таиландпен өткен Дэвис кубогы матчында құрама сапында ойнады: бірінші күні Қазақстанды алға шығарып, екінші күні әлемнің 387-ракеткасына есе жіберді, бірақ команда ақыры Дэвис кубогының плей-офф кезеңіне жолдама алды.
