Республикалық маңызы бар трассаларда биыл қыста қар тазалап, жол бетін өңдейтін 70-ке жуық комбинирленген жол машинасы жетіспейді. Жетпей тұрған техника жалға алынып, қар жауып, қатты жел соққан кезде жолға шығарылады. Бұл туралы 10 қарашада Орталық коммуникациялар қызметіндегі брифингте «ҚазАвтоЖол» басқарма төрағасы Дархан Иманашев хабарлады.
170 жаңа комбинирленген машинаны жеткізуге келісімшарт жасалған, бірақ жеткізушілердің алдын ала дерегінше, техника тек 10–15 желтоқсанда келеді. «Бірақ бізде Б жоспары бар, қажетті техниканы жалға аламыз», – деді Иманашев. Техниканы жалға беретін компаниялар конкурс арқылы таңдалып қойған. Соңғы екі жарым жылда компания 1900-ден астам арнайы техника сатып алып, жалпы тапшылық 5 мыңнан астам бірліктен шамамен 3 мыңға дейін қысқарған. Компания басшысының айтуынша, грейдер, бульдозер, тиегіш және трактор жеткілікті. Комбинирленген машиналарға сұраныс жөнделген жолдардың көбейгеніне байланысты артып отыр, өйткені грейдерлер негізінен бұзылған жолда жұмыс істейді.
Иманашев ең қиын учаскелерді де атады. Анықталған ақаулардың кемінде 60 пайызы Қызылорда – Ақтөбе жолына тиесілі, ол жаңа жоба аясында толық жөнделеді. Қарағанды – Жезқазған трассасында үш-төрт қиын учаске бар, онда күрделі жөндеу мен реконструкция жүріп жатыр. Тізімде Шу – Бурылбайтал учаскесі мен Қордай асуындағы жол айрығы да бар, ал «Батыс Еуропа – Батыс Қытай» бағытындағы Түркістан облысының жолдарына ерекше назар аударылып отыр. Компания жолдарды тексеріп, есеп дайындап жатыр, кейін қаражат пен мерзімді есептейді. «Алдын ала айтсам, келесі құрылыс маусымында бұл учаскелердің 30-40 пайызындағы кемшілікті жоюды жоспарлап отырмыз», – деді ол.
Ауа райы нашарлап, трасса жабылғанда және оның алдында кезек түзілгенде «ҚазАвтоЖол» қызметкерлері, негізінен оңтүстікте, кезектен бірнеше жүргізушіні алып, қар тазаланып жатқан жерге апарады. «Адамдар не болып жатқанын және жолдың неге жабылғанын өз көздерімен көре алады», – деп түсіндірді Иманашев. Кейін бұл жүргізушілер басқаларға неліктен күту керегін айтып бере алады.
Трассаларда қыс басталып та кетті: жуырда Ақмола және Павлодар облыстарында жазғы дөңгелекпен жүрген көліктерге жол жабылып, кейін Астанадан Щучинск пен Павлодарға баратын тасжолдар қайта ашылды, бірақ жылдамдыққа шектеу қойылды.
