Ұлттық статистика бюросы жаңартылған «Талдау» ақпараттық-талдау жүйесінде AI TALDAU жасанды интеллект көмекшісін іске қосты, бұл туралы Стратегиялық жоспарлау және реформалар агенттігі хабарлады. Енді ресми деректерді кестелерден қолмен іздеп отырмай-ақ, сұхбат түрінде сұрақ қойып алуға болады. Сервис азаматтарға, кәсіпкерлерге, журналистерге, зерттеушілерге, сарапшыларға және мемлекеттік органдарға арналған.
Көмекшіден, мысалы, «Павлодар облысында соңғы бес жылда орташа жалақы қалай өзгерді?» деп сұрауға немесе өңірлер бойынша халық санын салыстыруды өтінуге болады. Жауап кесте, график, диаграмма және талдамалық материал түрінде беріледі, сұрауды сұхбат барысында нақтылай беруге болады. AI TALDAU қазақ, орыс және ағылшын тілдерінде жұмыс істейді, нәтижені PDF, Word, PowerPoint және Excel форматтарында сақтауға болады. Сервис new-taldau.stat.gov.kz сайтында қолжетімді.
Көмекшімен бірге «Талдау» жүйесінің өзі де жаңарды: дизайны, навигациясы және іздеу құралдары өзгерді. Пайдаланушылар өңірлер мен кезеңдер бойынша егжей-тегжейлі статистиканы көріп, кесте мен графикті өздері құрастыра алады, көрсеткіштерді салыстырып, нәтижені жеке кабинетте сақтай алады. Деректерді әрі қарай өңдеу үшін машинамен оқылатын форматтарда жүктеп алу мүмкіндігі де бар.
«Талдау» – ресми статистиканың ашық базасы, Ұлттық статистика бюросының деректері, оның ішінде 10 айдағы ІЖӨ өсімі сияқты негізгі экономикалық көрсеткіштер осы жерде жарияланады. Бұған дейін бюро AI Stat жасанды интеллект көмекшісін сынақтан өткізген, ол ведомствоның цифрлық сервистері мен Респондент кабинетінде бағдар табуға көмектеседі.
