Жамбыл облысының прокуратурасы Қордай ауданына қарасты Қаракемер ауылындағы оқушылар арасындағы қорқытып алушылық ісі бойынша тергеуді аяқтады. Тергеу бұл бопсалауды кәмелетке толмаған үш баланың қаза табуымен байланыстырды. Іс 23 қазанда кәмелетке толмағандардың істері жөніндегі мамандандырылған ауданаралық сотқа жолданды. Бұл туралы облыс прокуратурасы хабарлады.
Прокуратураның мәліметінше, жергілікті мектеп оқушылары арасында «Жүйе» («Система») деп аталатын бейресми топ әрекет еткен. Оның өз иерархиясы мен жүріс-тұрыс ережелері болған, мүшелері үлкендерге міндетті түрде бағынған, ал ережені бұзғандар жазаланған. Тергеу жиналған дәлелдер ақша бопсалау мен үш баланың өлімі арасындағы себеп-салдарлық байланысты растайды деп есептейді.
Жеті адамға айып тағылды. Олардың екеуі қорқытып алушылық (Қылмыстық кодекстің 194-бабы) және өзін-өзі өлтіруге дейін жеткізу (ҚК-нің 105-бабы) баптары бойынша айыпталып, күзетпен ұсталып отыр. Қалған бесеуі тек қорқытып алушылыққа айыпталды, оларға басқа бұлтартпау шарасы таңдалды. Айыпталушылардың кінәсі бар-жоғын түпкілікті сот шешеді.
Прокуратураның айтуынша, «Жүйе» тобының әрекеті тоқтатылды. Қадағалау органы уәкілетті мемлекеттік органдардың жұмысын да тексеріп, қылмыстардың жасалуына жол берген себептер мен жағдайларды жою үшін ұсыныстар енгізді. Қазір бұл ұсыныстар қаралып жатыр.
Жамбыл облысының мектептеріндегі бопсалау мен зорлық-зомбылық туралы бұрын да айтылған. 2025 жылы Бала құқықтары жөніндегі уәкіл Динара Закиева өңір мектептеріндегі қорқытып алушылық, «дедовщина» және буллинг туралы айтқан еді.
Егер баланы қорлап жүрсе немесе одан ақша талап етсе, ата-аналар мен балалардың өзі отбасы және балалар құқықтарын қорғау мәселелері жөніндегі 111 желісіне немесе балалар мен жастарға арналған 150 сенім телефонына тегін хабарласа алады. Буллингті қалай байқауға және қайда шағымдануға болатынын мектептегі буллинг туралы материалда жазған едік, ал тегін психологиялық көмек нөмірлері жеке мақалада жинақталған.
