Өскеменде Ертіс арқылы салынатын жаңа көпірдің құрылысы үшін 1492 ағаш пен 33 бұтаны кесу жоспарланып отыр. Бұл сандар 20 қазандағы жоспарланып отырған қызмет туралы өтініште келтірілген, құжатты YK.KZ журналистері зерделеген. Деректер әзірге алдын ала берілген: құжат әлі бекітілмеген.
Учаскеде барлығы 1524 ағаш, 33 бұта және 684 шаршы метр жабайы өскін есепке алынған. Құрылыс үшін кесілетін ағаштардан бөлек, тағы 19 ағаш санитариялық кесуге жатады, ал орнында тек 13 ағашты қалдыру көзделген. 2025 жылы аумақты облыстық жолаушылар көлігі және автомобиль жолдары басқармасының тапсырысымен Green-Balance компаниясы зерттеген. Компания жай-күйі қанағаттанарлық 1511 ағашты санаған, олардың көбі – терек (668), үйеңкі (564) және қарағаш (244).
Green-Balance кесілген ағаштардың орнын он есе көп көшетпен толтыруды ұсынады: биіктігі 2,5 метр жапырақты және биіктігі 2 метр қылқан жапырақты көшеттер отырғызып, оларды тиісінше екі және үш жыл күтіп-баптау қажет. Іс жүзінде қанша ағаш, қай жерге отырғызылатыны өтініште көрсетілмеген.
Құрылыс жеке учаскелерді де қамтиды. Жер мемлекет мұқтажы үшін алынып жатыр, кейбір құрылыстар, соның ішінде саяжай үйлері сүріледі, ал иелеріне өтемақы қарастырылған.
Ертістің екі жағалауында жұмыс 1 қазанда басталды. Сол кезде ШҚО әкімдігі көпір Серікбаев көшесінің айналма жол торабынан әрі жалғасатын бөлігі болатынын хабарлаған. Көпірде алты жолақ болады, ол тәулігіне 80 мыңға дейін көлік өткізе алады, ал құрылыс екі жылға есептелген. Көпірдің ұзындығы – 835 метр, ол қаладағы ең ұзын көпір болмақ. Жұмыс жобасын алматылық «Казахский Промтранспроект» компаниясы әзірлеген, тапсырыс беруші – облыстық жолаушылар көлігі және автомобиль жолдары басқармасы, құрылысты «ОблШығысЖол» ЖШС жүргізіп жатыр. «Жаңа өткел Өскемен бойынша жүріп-тұруды ыңғайлы етіп, жол қозғалысының қауіпсіздігін арттыруы тиіс», – деді жұмыс басталған кезде облыс әкімі Нұрымбет Сақтағанов.
Ертіс арқылы өтетін жаңа көпір қаланың 2009 жылғы бас жоспарына енгізілген, бірақ жоба 20 жылға жуық кейінге шегеріліп келді.
