Біріккен Араб Әмірліктерінің астанасы Әбу-Дабиде 10 қарашада Украина, АҚШ және Ресейдің соғысты тоқтату жөніндегі үшжақты келіссөздері басталды. Украина делегациясының басшысы Рустем Умеров үшжақты форматқа Киев уақытымен сағат 10:30 шамасында (Астана уақытымен 13:30-да) көшкендерін хабарлады. Үш тарап ақпаннан бері алғаш рет бетпе-бет кездесіп отыр: ол кезде АҚШ пен Израиль Иранға қарсы соғыс бастағаннан кейін келіссөздер тоқтап қалған еді. Келіссөз екі күнге – 10 және 11 қарашаға жоспарланған.
Украин делегациясы күнді одақтастарымен кеңесуден бастады. Умеровтың айтуынша, алғашқы кездесуге Ұлыбритания, Франция, Германия, Италия, НАТО және Еуропалық комиссия өкілдері келді, оларға АҚШ президентінің арнайы өкілі Стив Уиткофф пен Дональд Трамптың кеңесшісі Джаред Кушнер қосылды. Украина делегациясының құрамында Президент кеңсесінің басшысы Кирилл Буданов, оның бірінші орынбасары Сергей Кислица, «Халық қызметшісі» фракциясының басшысы Давид Арахамия және әскери барлау бастығының орынбасары Вадим Скибицкий бар.
Украина бұл келіссөзде төрт негізгі мәселені көтереді: соғыс қимылдарын тоқтату, соғыстан кейінгі сенімді қауіпсіздік кепілдіктері, экономиканы қалпына келтіру және гуманитарлық мәселелер. «Осы мәселелерде барынша алға жылжып, бейбітшілікті жақындату үшін жұмыс істеп жатырмыз», – деп жазды Умеров. Буданов келіссөздерді «ұзақ жол» деп атап, қазір ең бастысы – «нақты нәтиже» екенін айтты. Владимир Зеленский Украина шиеленісті бәсеңдету қадамдарын ұсынатынын және үш ел көшбасшыларының кездесуі туралы мәселе көтеретінін айтқан болатын.
Бір күн бұрын АҚШ мемлекеттік хатшысы Марко Рубио Украинаға берілетін қауіпсіздік кепілдіктері Ресейге де қолайлы болуы керек деп мәлімдеді, ал америкалық шенеунік Вашингтон Мәскеудің соғысты аяқтауға шынайы ниетін алғаш рет көргенін айтты. Алайда Ресей әскері соққыларын тоқтатқан жоқ: Украина Әуе күштерінің хабарлауынша, келіссөз қарсаңындағы түні Ресей Украинаға «Искандер-М» баллистикалық зымыранын және 162 шабуылдаушы дрон ұшырды, 19 жерде соққы тіркелді.
Украина мен Ресейдің 2025 жылы Түркиядағы келіссөздері тек тұтқын алмасумен аяқталған. 2025 жылдың күзінде АҚШ 28 тармақтан тұратын жоспарын ұсынды, бірақ Украина мен еуропалық одақтастары оны қабылдамады. Одан кейін кездесулер Швейцария мен БАӘ-де өтті. Украина командасының құрамы мен жоспарланған кездесулер туралы airpress.kz кеше жазған болатын.
