Украина делегациясы 9 қарашада соғысты аяқтау жөнінде АҚШ және Ресеймен үшжақты келіссөз жүргізу үшін Біріккен Араб Әмірліктерінің астанасы Әбу-Дабиге аттанды. Кездесулер 10–11 қараша, сейсенбі мен сәрсенбі күндері американ тарапының делдалдығымен өтеді. Бұл туралы украин делегациясын басқаратын Украина Сыртқы барлау қызметінің басшысы Рустем Умеров хабарлады.
Умеровтан бөлек, топ құрамына Президент кеңсесінің басшысы Кирилл Буданов пен оның бірінші орынбасары Сергей Кислица, ҚМ Бас барлау басқармасы бастығының орынбасары Вадим Скибицкий және Жоғарғы Рададағы «Халық қызметшісі» фракциясының жетекшісі Давид Арахамия енді. Президенттің коммуникация жөніндегі кеңесшісі Дмитрий Литвиннің нақтылауынша, делегацияға барлау сарапшысы да қосылады.
Умеровтың айтуынша, осы күндері Әбу-Дабиде Ұлыбритания, Франция, Германия мен Италияның, НАТО мен Еуропалық комиссияның өкілдері де болады, Украина еуропалықтармен жеке үйлестіру кездесулерін өткізеді. «Біз үшін барлық негізгі серіктестермен тығыз үйлестіруді сақтау аса маңызды», — деп жазды ол. Умеров Киевтің мақсатын ұзақ мерзімді әрі тұрақты бейбітшілік, Украина қауіпсіздігіне кепілдік және соғыстан кейін қалпына келуге нақты мүмкіндік деп атады. Ол кездесуді ұйымдастырғаны үшін Әмірліктерге, сондай-ақ дайындық жұмысы үшін АҚШ президентінің арнайы өкілі Стив Уиткофф пен Дональд Трамптың күйеу баласы Джаред Кушнерге алғыс айтты.
«Еуропалық правда» басылымы ЕО мен НАТО-дағы дереккөздерге сілтеме жасап анықтағандай, кездесуде Еуропалық комиссияның атынан Урсула фон дер Ляйеннің кеңсе басшысы Бьорн Зайберт, НАТО атынан альянс штабының бастығы Джеффри ван Леувен қатысады. Германия, Франция және Ұлыбритания өздерінің ұлттық қауіпсіздік жөніндегі кеңесшілері — Гюнтер Заутер, Эммануэль Бонн және Джонатан Пауэллді жібереді. Ал Ресейде Украина және АҚШ-пен кездесу еуропалықтарсыз өтеді деп мәлімдеді.
Кремльдің мәліметінше, ресейлік делегацияны Путиннің көмекшісі Владимир Мединский басқарады. Бұл — ақпаннан бергі осындай форматтағы алғашқы келіссөз. Бұған дейін Франция СІМ басшысы Жан-Ноэль Барро бұл жолы еуропалықтар сыртта қалмайтынын уәде еткен. Ресей бұрынғыдай Украинадан елдің шығысындағы Донбастан әскерін шығаруды талап етіп отыр, Киев мұны қабылдамайды. Кездесу қарсаңында Ресей әскері украин қалалары мен энергетика нысандарына соққы беруін жалғастырып жатыр: 9 қарашаға қараған түні ол Украинаға 317 шабуылдаушы дрон ұшырды.
