Астана әкімдігі қалалық автобустарда жол жүру ақысын көтеруді кейінге шегерді. Жаңа тарифті 1 желтоқсаннан енгізу жоспарланған еді, енді оны айдың ортасынан бастап белгілеу ұсынылып отыр. Картамен немесе қосымша арқылы төлегенде жол ақысы қазіргі 110 теңгенің орнына 150 теңге болады, яғни 40 теңгеге қымбаттайды.
«Желтоқсанның ортасынан бастап қолма-қол ақшасыз төлеу кезінде жол жүру құнын 150 теңге мөлшерінде белгілеу ұсынылады», — деп хабарлады елорда әкімдігі. Қалған бағалар бұрын жарияланған күйінде қалды:
- қарапайым қалалық немесе әлеуметтік маңызы бар бағыт — қолма-қол ақшасыз 150 теңге, қолма-қол ақшамен 300 теңге;
- экспресс-автобус — қолма-қол ақшасыз 300 теңге, қолма-қол ақшамен 400 теңге;
- қала маңындағы бағыт — қолма-қол ақшасыз әр шақырымға 13 теңге, қолма-қол ақшамен 19 теңге.
Электрондық төлем жүйесі істен шықса, қолма-қол ақшасыз төлейтін жолаушылар тегін жүреді.
Жеңілдігі бар азаматтар бұрынғыдай тегін жүреді. Олардың қатарында Ұлы Отан соғысының қатысушылары мен мүгедектері және оларға теңестірілген адамдар, жасы немесе еңбек сіңірген жылдары бойынша зейнеткерлер, жасына байланысты немесе асыраушысынан айырылуына байланысты мемлекеттік әлеуметтік жәрдемақы алатын зейнет жасындағы азаматтар, көпбалалы аналар мен көпбалалы отбасылар, мүгедектігі бар адамдар, мүгедектігі бар 18 жасқа дейінгі балалар мен олардың ата-анасының бірі немесе заңды өкілі, сондай-ақ 1986 жылғы 17–18 желтоқсан оқиғаларына байланысты саяси қуғын-сүргіннен зардап шегіп, ақталған адамдар бар. 2020 жылғы наурыздан бастап Астанада оқитын 18 жасқа дейінгі балалар да тегін жүреді. Әлеуметтік маңызы бар бағыттарда жеңілдікті көлік картасымен де тегін жүруге болады.
Әкімдік қымбаттауды тасымалдаушылардың шығыны артқанымен түсіндіреді. 2014 жылы бір литр дизель отыны шамамен 107 теңге тұрса, қазір 329 теңге, яғни үш есе қымбат. Жүргізушілердің жалақысы осы жылдары автобус класы мен ауысымға қарай 100–150 мың теңгеден 700 мың теңгеге дейін, одан да жоғары өсті. Қаржы автопаркті жаңартуға және бағыт желісін дамытуға да қажет.
2014 жылы елордадағы автобуста жол жүру 90 теңге тұратын, содан бергі 12 жылда тариф бір-ақ рет қайта қаралып, қазіргі 110 теңгеге жетті. Жаңа бағалар туралы әкімдік қазан айында хабарлаған, сол кезде қолма-қол ақшамен төлеуді қайтару туралы да шешім қабылданды.
