Стивен Спилберг алғашқы вестернін түсіруді 2027 жылы бастауды жоспарлап отыр. Бұл туралы The Hollywood Reporter басылымына режиссердің тұрақты операторы Януш Камински айтты. Оның сөзінше, бұл фильм олардың келесі бірлескен жұмысы болмақ. Картинаның атауы мен актерлік құрамы әзірге жарияланған жоқ.
Камински сұхбатты Польшаның Торунь қаласында өтіп жатқан Camerimage фестивалінде THR басылымының Visionary in Cinematography сыйлығын алуына орай берді. Ол болашақ фильмнің бейнесі туралы қазірдің өзінде ойланып жүргенін және балалық шағы өткен Польшадан шабыт алатынын айтты: «Біз Судет тауларындағы бір өңірге баратынбыз – ол жер жай ғана әдемі еді, жайпақ төбелер. Жер бедері, жердегі қар, тұман». Оператордың айтуынша, бұл табиғат оған Монтананы еске салады.
Спилбергтің өзі вестерн туралы наурыз айында Остинде өткен SXSW фестивалінде The Big Picture подкастына берген сұхбатында айтқан болатын. Режиссер фильмде жылқылар болатынын, ал оқиға жанрлық қалып пен стереотиптерден ада болатынын уәде етіп, жобаның «керемет» болып шығып жатқанын айтты.
Спилберг 18 желтоқсанда 80 жасқа толады, ал оның фильмографиясында әлі күнге дейін толыққанды вестерн болған емес. Бұл жанрға ол «Индиана Джонс және соңғы крест жорығы» (Indiana Jones and the Last Crusade, 1989) фильмінде ғана жақындаған еді: картина жас Индиананың 1912 жылы Ютадағы оқиғасынан басталады. Режиссердің соңғы фильмі – Эмили Блант пен Джош О’Коннор ойнаған «Disclosure Day» фантастикалық триллері 2026 жылғы маусымда экранға шықты.
Януш Камински Спилбергпен 1993 жылдан, «Шиндлер тізімі» (Schindler’s List) фильмінен бері жұмыс істеп келеді. Осы фильм мен «Қатардағы Райанды құтқару» (Saving Private Ryan) картинасындағы операторлық жұмысы оған екі «Оскар» әкелді.
