Warner Bros. студиясының сегіз фильмінде Гарри Поттерді сомдаған Дэниел Рэдклифф Джоан Роулинг кітаптары бойынша түсірілген HBO-ның жаңа телехикаясын көрмеуі мүмкін екенін мойындады. Актер бұл туралы Нью-Йоркте Netflix-тің Steps анимациялық фильмінің әлемдік премьерасында Associated Press агенттігіне айтты.
«Шынымды айтсам, көремін бе, жоқ па, білмеймін. «Гарри Поттерде» онсыз да көп түсірілдім», — деді Рэдклифф. Оның айтуынша, ол телехикаяларды мүлде көрмейді: «Мен Breaking Bad-ті көрген жоқпын. Mad Men-ді де көрмедім. Сондықтан сегіз сағат — кез келген нәрсе үшін көптеу».
Рэдклифф Гарри рөлін жаңадан сомдайтын Доминик Маклафлинге кеңес беруге де ниетті емес. «Доминикке ешқандай кеңес бермеуге шындап бел будым. Оның қолынан келеді. Байғұс баланы сұхбаттар арқылы мазалағым келмейді», — деп түсіндірді актер. Оның сөзінше, Маклафлин «керемет болады», әрі ол онымен бір күні танысамын деп үміттенеді.
Осы аралықта HBO Max телехикаяның үш кейіпкерлік постерін көрсетті: оларда сиқырлы таяқшаларын ұстаған Гарри (Доминик Маклафлин), Гермиона Грейнджер (Арабелла Стэнтон) және Рон Уизли (Аластер Стаут) бейнеленген. «Гарри Поттер және пәлсапа тасы» телехикаясы HBO мен HBO Max платформаларында 25 желтоқсанда шығады.
Сегіз сериядан тұратын бірінші маусым Роулингтің бірінші кітабы бойынша түсірілді. Дамблдорды Джон Литгоу, Минерва Макгонагаллды Джанет Мактир, Северус Снеггті Паапа Эссиеду, Хагридті Ник Фрост сомдайды. Қалған актерлерді HBO 2025 жылдан бері кезең-кезеңімен бекітіп келеді, ал телехикаяның музыкасын Bleeding Fingers Music командасымен бірге Ханс Циммер жазып жатыр.
Телехикаяның трейлері қыркүйекте «Гарри Поттердің» ресми YouTube-арнасында жарияланды:
Рэдклифф Гарри Поттер рөлін 2001–2011 жылдары сомдады және бұған дейін де жаңа телехикаяда көрінуге ұмтылмайтынын айтқан. Қазір ол Netflix-тің «Күлшеқыз» ертегісінің анимациялық нұсқасы — Steps фильмін таныстырып жүр, онда дыбыстаудағы серіктестері — Янг Мазино мен Питер Динклэйдж. Фильм стримингте 20 қарашада шығады.
