Джонни Депп Эбенезер Скрудж рөлін сомдаған «Эбенезер: Рождестволық хикая» (Ebenezer: A Christmas Carol) фильміне алғашқы пікірлер екіге бөлінді: сыншылар актердің ойыны мен фильмнің түнерген готикалық стилін мақтап жатыр, алайда кейбірі жаңа экрандауды артық деп санайды. Алғашқы көрсетілімдерден кейінгі пікірлерді Variety басылымы жинады. Paramount студиясының фильмі АҚШ пен Ұлыбритания кинотеатрларында 13 қарашада шығады.
Фильмді ұнатқандардың бірі — FilmSpeak сайтының сыншысы Том Чаталбаш. Ол картинаны «зымияндықпен көңілді мерекелік сый» әрі жұлдыз үшін сәтті оралу деп атады. Британ сыншысы Фил Робертс Депп «Скруджның түзелу жолында көрермен назарын үнемі өзіне аударып отырады» деп жазды, ал Critics Choice кинотанушылар қауымдастығының мүшесі Кларенс Мой фильмді «жағымды тосынсый» деп бағалады.
Скептиктердің пікірі қатаңырақ. Мэриэнн Йохансон фильмді «мүлде артық» деп атады, Рен Виейра бұл нұсқада «ерекше немесе бірегей ештеңе жоқ» деді, ал Роберт Ортис картинаның «екі кемшілігі бар: тез ұмытылады және жай ғана жалықтырады» деп жазды.
Премьералық көрсетілімдер қараша айының басында Нью-Йоркте өтті, ал 9 қарашада фильм Лондондағы Лестер-сквер алаңында таныстырылды.
Фильмнің режиссері — «X» және «Пэрл» қорқынышты фильмдерімен танымал Тай Уэст. Сценарийді Чарльз Диккенстің 1843 жылғы «Рождестволық әнұран» (A Christmas Carol) повесі бойынша Натаниэл Халперн жазды. Деппен қатар фильмде мына актерлер ойнады:
- Иэн Маккеллен — Джейкоб Марли;
- Руперт Гринт — Боб Крэтчит;
- Андреа Райзборо — Өткен Рождество рухы;
- Трамелл Тиллман — Осы Рождество рухы;
- Сэм Клафлин — Скруджның жиені Фред;
- Дейзи Ридли.
Фильмнің ресми трейлерін Paramount жазда жариялады:
Депп үшін «Эбенезер» — 2018 жылғы «Ғажайып аңдар: Грин-де-Вальдтың қылмыстары» (Fantastic Beasts: The Crimes of Grindelwald) фильмінен және 2022 жылы бұрынғы әйелі Эмбер Хердпен болған шулы соттан кейінгі алғашқы ірі Голливуд жобасы. Көктемде актер фильмнің кадрларын CinemaCon көрмесінде алғаш рет көрсетті, ал алғашқы трейлер шілдеде шықты. Тамызда продюсер Джерри Брукхаймер Деппен «Кариб теңізінің қарақшылары» франшизасының алтыншы бөлімінде Джек Воробей рөліне оралуы туралы келіссөз жүргізіп жатқанын растады.
