АҚШ-тың Anthropic компаниясы 9 қарашада Claude Fable 5.2 және Claude Mythos 5.2 модельдерін таныстырды. Бұл – компанияның бағдарламалауға, ғылыми зерттеулерге және ЖИ-агенттер өз бетінше орындайтын ұзақ тапсырмаларға арналған ең қуатты модельдерінің жаңа нұсқалары. Шын мәнінде бұл – екі нұсқадағы бір модель: Fable барлық пайдаланушыға ашық, ал киберқауіпсіздік пен биология саласындағы шектеулердің бір бөлігі алынған Mythos-ты тек тексеруден өткен ұйымдар ала алады.
Компанияның мәліметінше, жаңа нұсқа алдыңғысынан 30%-ға дейін жылдам жауап береді, өз әрекетін түсініктірек түсіндіреді, ал қорғаныс сүзгілері Fable 5.1-ге қарағанда шамамен 55%-ға сирек іске қосылады. Anthropic модельдің көмегімен қара құрдымдарға қатысты теориялық физиканың екі есебі шешілгенін айтады. Сондай-ақ мыңға жуық ЖИ-агент шамамен 30 сағатта Ферманың ұлы теоремасының дәлелін дәлелдемелерді тексеретін бағдарламалар түсінетін тілге аударған. Mythos 5.2 бағдарламалардағы осалдықтарды алдыңғы нұсқадан 14,4%-ға көп табады.
Fable 5.2 Claude қосымшаларында және Amazon, Google, Microsoft бұлттары арқылы қолжетімді. Pro және Team тарифтерінің жазылушылары оған апталық лимиттің жартысына дейін жұмсай алады, ал тегін нұсқа туралы компания ештеңе айтпады. Әзірлеушілер үшін модель арзандады: кіріс токендерінің әр миллионы 8 доллар, шығыс токендерінікі 40 доллар тұрады, бұрын бағасы 10 және 50 доллар болатын (токен – мәтін көлемі есептелетін сөз бөлшегі). Қазақстан Claude жұмыс істейтін елдердің ресми тізімінде бар, сервис орыс тілін түсінеді, ал қазақ тілін жеке қолдау туралы хабарламада ештеңе айтылмаған. Mythos 5.2 киберқауіпсіздік мамандары мен өмір туралы ғылымдар саласындағы ғалымдарға арналған тексеру бағдарламалары арқылы беріледі.
Тәуелсіз Artificial Analysis рейтингі Fable 5.2-ні бірінші орынға қойды: модель 65 ұпай жинады, Google Gemini 4 Carbon – 60, Claude Opus 5.5 – 59 ұпай. Алайда пәрмен жолындағы бағдарламалау тапсырмаларында модель Kimi K3.1 Pro мен Gemini 4 Carbon-нан қалып қояды. Ең жоғары баптауда бір тапсырма орта есеппен 26,5 доллар тұрады, бұл Opus 5.5-тен 2,5 еседен астам қымбат. Күнделікті жұмыс үшін Anthropic-тің өзі әлі де Opus 5.5-ті ұсынады.
Қауіпсіздік туралы есебінде Anthropic жаңа модельдер өздерін сынап жатқанына бұрынғыларға қарағанда жиі күдіктенетінін мойындайды. Сол себепті олардың нақты жұмыстағы мінез-құлқын болжау қиындай түседі. Компания ЖИ-дің өзін әзірлеуді жеделдетуі мүмкін қабілеттерді әдейі шектегенін де жазады. Модельдер тәуелсіз METR ұйымының есебі жарияланған тұста шықты: TechCrunch атап өткендей, ұйымның бағалауынша, Anthropic-тің ішкі модельдері компания зерттеулерін шамамен екі есе жеделдетіп отыр. Модельдерді шығарар алдында Ұлыбританияның ЖИ қауіпсіздігі институты мен METR тексерген.
Anthropic – OpenAI мен Google-дың басты бәсекелестерінің бірі, Claude чат-ботын әзірлеуші. Алдыңғы Fable 5.1 нұсқасы қыркүйектің басында шыққан. Жаңа модельдер Anthropic IPO-ға құжат тапсырғаннан, яғни биржаға шығуға өтініш бергеннен кейін екі аптадан соң жарық көрді.
