Бірінші орта салмақтағы қазақстандық боксшы Садриддин Ахмедов (15-0-1, 13 КО) Халықаралық бокс қауымдастығының (IBA) кәсіпқой жобасы IBA.Pro-мен бірнеше жекпе-жекке келісімшарт жасасты. Бұл туралы спортшы Sports.kz-ке берген сұхбатында айтты. «Қазір IBA Pro-мен бірнеше жекпе-жекке келісімшартқа қол қойдым», — деді Ахмедов. Оның сөзінше, мансабын әрі қарай қалай жалғастыратыны туралы өз жоспары бар.
Боксшының айтуынша, оған 4 желтоқсанда Түркияда жекпе-жек өткізуді уәде етіп отыр. Қарсыласы әлі белгісіз, өтетін орнын IBA.Pro өзі таңдаған. Бұл белдік үшін емес, рейтингтік жекпе-жек болмақ. Ахмедов бұған дейін оған екі рет жекпе-жек ұйымдастырылғанын, бірақ екеуі де өтпей қалғанын айтты.
Промоутерін ауыстырумен қатар боксшы командасын да жаңартты. Ол Геннадий Головкинді жұлдызға айналдырған мамандар — промоутер Том Леффлермен және бапкер Абель Санчеспен жолын айырды. Ахмедовтың айтуынша, Леффлердің компаниясы барлық боксшыларымен бірге Zuffa Boxing құрамына өткен. Оған да сонда жұдырықтасуды ұсынған, бірақ ол кезде лигада оның салмақ дәрежесі болмаған. Қазір ол Қазақстанда өзін кезінде Канадаға жіберген бапкері Ернур Жанабаймен дайындалып жүр, ал АҚШ-та аргентиналық бапкер Педро Неммен жұмыс істейді.
Ахмедов кәсіпқой рингте 2018 жылы Канадада дебют жасап, кейін АҚШ-қа көшті. Соңғы жекпе-жегін ол 2025 жылғы 19 сәуірде Калифорниядағы Commerce Casino-да мексикалық Элиас Эспадаспен өткізді. Кездесу төрешілердің көпшілік шешімімен тең нәтижемен аяқталды (95:95, 96:94, 95:95). Бұл — оның мансабындағы жеңіспен аяқталмаған алғашқы жекпе-жек. Боксшының айтуынша, сол кездесудің екінші раундында ол қолын жарақаттап, кейін ұзақ уақыт ауырсынуды сезінген.
2025 жылдың жазында қазақстандық боксшы тамызда АҚШ-тың Санта-Инез қаласында рингке оралатынын хабарлаған, бірақ содан бері бірде-бір жекпе-жек өткізген жоқ.
