18 жастағы қазақстандық шабуылшы Бексұлтан Мақыш Онтарио хоккей лигасында (OHL) клубын ауыстырды. Бұл — ойыншылар НХЛ-ға көбіне осы жерден жол табатын Канаданың үш басты жастар лигасының бірі. «Уинсор Спитфайрз» оны «Флинт Файрбердзге» айырбастады, келісім туралы лиганың өзі хабарлады.
Оның орнына «Уинсор» шабуылшы Джош Колосимоны және OHL драфтарындағы үш таңдау құқығын алды. «Флинт» 2027 жылғы тоғызыншы раундтағы және 2030 жылғы үшінші раундтағы өз таңдауларын, сондай-ақ бұрын «Ниагараға» тиесілі болған 2030 жылғы драфтың бесінші раундындағы таңдауды берді.
Айырбас туралы ресми хабарламаны OHL Instagram-да жариялады:
Биылғы тұрақты чемпионатта Мақыш «Уинсор» сапында 16 матч өткізіп, бес шайба соқты, жеті ұпай жинады. OHL-дегі алғашқы маусымында ол 68 кездесуде 39 ұпай жинаған. Sports.kz дерегінше, қазақстандық 2027 жылғы НХЛ драфтында таңдалуы мүмкін.
Жаңа командадағы алғашқы ойыны бірден ерекше болуы ықтимал: тұрақты чемпионаттың алдағы матчында «Флинт» дәл «Уинсорды» қабылдайды. Ойын 15 қарашада Қазақстан уақытымен сағат 05:00-де басталады.
Мақыш 2008 жылы Астанада туған. 2025 жылдың жазында «Уинсор» оны Канада хоккей лигасының импорт драфтының екінші раундында жалпы 114-нөмірмен таңдады. Содан кейін қазақстандық клубпен келісімге қол қойып, Солтүстік Америкаға ойнауға аттанды.
