УЕФА Ұлттар лигасының алтыншы, қорытынды турындағы Қазақстан — Словакия ойынына Алияр Агаев бастаған әзербайжандық төрешілер бригадасын тағайындады. Кездесу бүгін, 16 қарашада, «Астана Аренада» өтеді, ойын Астана уақытымен сағат 20:00-де басталады. Бұл туралы Sports.kz хабарлайды.
Алаңда Агаевқа Зейнал Зейналов пен Ақиф Амирали көмекші болады, төртінші төреші — Ингилаб Мамедов. Бейнеқайталауды (VAR) австриялық Алан Кияс бақылайды, оның көмекшісі — Ниджат Исмаилли.
Қазақстан мен Словакия С лигасының 3-тобында Фарер аралдары және Молдовамен бірге ойнап жүр. Бес турдан кейін словактар 11 ұпай жинап, бірінші орынды мерзімінен бұрын қамтамасыз етті. Джон ван ’т Схип командасының екі ұпайы бар, ол соңғы, төртінші орында тұр, ал жоғары дивизионға көтерілу мүмкіндігінен Молдовадан екінші рет жеңілгеннен кейін айырылды.
Командалардың алғашқы кездесуі 29 қыркүйекте Кошицеде өтті: Словакия 2:1 есебімен жеңді, қазақстандықтардың жалғыз голын Рамазан Каримов соқты. Бесінші турда Қазақстан құрамасы Кишиневте Молдоваға 1:2 есебімен жол берді. Словактар Астанаға капитаны Милан Шкриньярсыз және тағы алты ойыншысыз келді, ал ван ’т Схип ойын алдында құраманың нәтижесіне өзі жауап беретінін айтты.



