Ресей дроны 11 қарашада Киевтен шамамен 100 шақырым шығыстағы Киев облысының Яготин қаласында екі құтқарушының өмірін қиды. Өрт сөндірушілер қалаға жасалған кезекті шабуылдан кейін шыққан өртті сөндіріп жатқанда, Ресей әскері сол жерге тағы соққы берді. Бұл туралы Украина Төтенше жағдайлар мемлекеттік қызметінің (ТЖМҚ) басшысы Андрей Даник хабарлады. Тағы екі құтқарушы жараланып, ауруханаға түсті.
Азаматтық қорғау қызметінің майоры, ТЖМҚ-ның Киев облысындағы 24-мемлекеттік өрт сөндіру-құтқару бөлімінің бастығы Александр Бондаренко мен 28-өрт сөндіру-құтқару бөлімінің жүргізушісі, бас шебер-сержант Юрий Литовченко қаза тапты. Бондаренко құтқару қызметінде 25 жыл еңбек еткен, артында әйелі, қызы мен ұлы қалды. Литовченко қызметке 30 жылдан астам уақытын арнаған, артында әйелі мен ұлы қалды. Құтқарушылар Сергей Мусияка мен Валентин Мыхно жараланды.
«Мұндай хабардың ауыртпалығын жеткізуге сөз жетпейді», — деп жазды Андрей Даник. Ол қаза тапқандардың отбасыларына көңіл айтып, оларды батырлар деп атады.
Бір жерге біраз уақыттан кейін қайталап соққы беру — Ресей әскерінің белгілі тәсілі. Оның мақсаты — көмекке келгендерді, яғни құтқарушыларды, дәрігерлерді, полицейлерді өлтіру. Өрт сөндіріп, жараланғандарды үйінді астынан шығарып жатқан адамдарға жасалған мұндай соққы — лаңкестік шабуыл әрі әскери қылмыс: халықаралық гуманитарлық құқық құтқару қызметтерін тікелей қорғайды.
Яготинге 11 қарашада екі рет шабуыл жасалды. Күндіз ресейлік дрон жергілікті лицей аумағына құлады. Сол сәтте баспанада 171 бала, мұғалімдер мен қызметкерлер отырған, баспананың арқасында олардың ешқайсысы зардап шекпеді. Екінші шабуылдан кейін Киев облыстық әскери әкімшілігінің басшысы Тимур Ткаченко бір адамның қаза тапқанын және жараланғандар барын хабарлаған. Дрондар кәсіпорын аумағын, жеке үйлерді, көліктерді және екі балабақшаның ғимаратын зақымдады.
Ресей дрондары Киев облысына күн сайын дерлік шабуыл жасайды. Сол күні Ресей Одесса маңындағы Черноморск қаласындағы базарға да соққы беріп, онда төрт адам қаза тапты.
