Ариана Гранде сүйіктісі, биші әрі фотограф Рики Альваресмен бірге алғаш рет қызыл кілемге шықты. Жұп 11 қарашада Нью-Йорктегі Beacon театрында «Знакомство с родителями» комедиясының төртінші бөлімі — Focker-in-Law фильмінің әлемдік премьерасына келді. Гранде бұл фильмде басты рөлдердің бірін ойнады.
Гранде мен 35 жастағы Альварес 2015 жылы, ол әншінің Honeymoon Tour гастрольдік турында биші болып жүргенде танысқан. Ол кезде олар бір жылдай кездесіп, 2016 жылы айырылысқанымен, достық қарым-қатынасын сақтап қалды. Жұптың қайта табысқанын жазда People журналы хабарлады: басылымның дереккөзі ғашықтар «асықпай қадам басып жүр» деген. Тамызда әнші Instagram-да Альваресмен бірге түскен суреттерін жариялап, қарым-қатынасын өзі растады. Ал 7 қарашада екеуі оның r.e.m. beauty косметика брендіне арналған әзіл бейнероликке бірге түсті.
Focker-in-Law фильмінде Гранде Грег Факердің ұлы Генридің қалыңдығын ойнайды. Грегті бұрынғыдай Бен Стиллер, оның қайын атасы Джек Бернсті Роберт Де Ниро сомдады, ал Генри рөлі Скайлер Гизондоға бұйырды. Тери Поло, Блайт Даннер және Оуэн Уилсон да қайта оралды. Фильмді серияның бұрынғы барлық бөлімдерінің сценарийін бірлесіп жазған Джон Хэмбург түсірді. Комедия АҚШ прокатына 25 қарашада шығады.
Франшиза 2000 жылғы «Знакомство с родителями» (Meet the Parents) фильмінен басталды, кейін «Знакомство с Факерами» (2004) және «Знакомство с Факерами 2» (2010) шықты.
Ариана Гранде — әлемдегі ең танымал әншілердің бірі, «Грэмми» жүлдегері. 2024 және 2025 жылдары ол Wicked мюзиклінің екі бөлімінде Глинданы сомдап, біріншісі үшін «Оскарға» ұсынылды. Гранде 2021–2023 жылдары жылжымайтын мүлік агенті Далтон Гомеспен некеде болған, кейін Wicked фильміндегі әріптесі Итан Слейтермен кездесті. Олардың айырылысқаны туралы шілдеде БАҚ хабарлаған.
