«Сақиналар әміршісі: Голлумды аулау» (The Lord of the Rings: The Hunt for Gollum) фильмінің түсірілімі аяқталды. Негізгі түсірілім кезеңі біткенін фильмнің режиссері әрі Голлумды қайта сомдаған Энди Серкис The Morning Mosh Pit шоуына берген сұхбатында айтты. Warner Bros. фильмді 2027 жылғы 17 желтоқсанда прокатқа шығарады.
Серкис фильммен жұмысты Толкиннің ең күрделі кейіпкерлерінің біріне қайта оралған ғажайып сапар деп атады. Ол түсірілім жайлы толық айтпады, келесі жылы фильмді насихаттауға көңіл бөлетінін жеткізді.
Түсірілім шілденің ортасында Жаңа Зеландияда басталды — Питер Джексонның трилогиясы да осы елде түсірілген. Джексон Фрэн Уолш және Филиппа Бойенспен бірге фильмнің продюсері, ал Уолш пен Бойенс сценарий авторларының қатарында. Бұған дейін Серкис Variety басылымына фильмде кейбір актерлерді жасарту үшін жасанды интеллект қолданылатынын растаған, бірақ олардың кім екенін атамаған.
Оқиға «Хоббит» пен The Fellowship of the Ring аралығында өтеді: Голлум Сауронның күштерін Бәрін билейтін сақинаға бастап бармас бұрын Гэндальф жас Арагорнды оны іздеп табуға жібереді. Арагорнды Вигго Мортенсеннің орнына Джейми Дорнан сомдады. Актердің айтуынша, ол өз көріністерін түсірілім аяқталарынан үш аптадай бұрын бітірген. Гэндальфты қайтадан Иэн Маккеллен ойнады, фильмге Кейт Уинслет те түсті.
«Голлумды аулау» — «Хоббит» трилогиясынан (2012–2014) кейін Толкин шығармалары бойынша түсірілген алғашқы көркем фильм болмақ. Джексонның «Сақиналар әміршісі» трилогиясы (2001–2003) әлемдік прокатта 3 млрд долларға жуық (шамамен 1,3 трлн теңге) табыс тауып, 17 «Оскар» жеңіп алды, оның 11-і The Return of the King фильміне тиесілі. Осы аралықта Prime Video-да «Билік сақиналары» телехикаясының үшінші маусымы басталды — ол Средиземьенің Екінші дәуіріндегі оқиғаларды баяндайды.
