Тейлор Свифт 18 қарашада Нэшвиллдегі «Бриджстоун» аренасында өтетін Кантри музыкасы қауымдастығының 60-шы CMA Awards сыйлығын табыстау рәсімінде өнер көрсетеді. Бұл туралы 13 қарашада ұйымдастырушылар мен ABC телеарнасы хабарлады. Свифт бұл сыйлықтың сахнасында 13 жылдан кейін алғаш рет ән айтады.
Биыл Свифт Джек Антоноффпен бірге Disney және Pixar студияларының «Ойыншықтар хикаясы 5» мультфильміне жазып, продюсерлік еткен I Knew It, I Knew You әнімен «Жыл синглі» аталымына ұсынылды. Онымен бірден екі әні – Be Her және Choosin’ Texas арқылы Элла Лэнгли, сондай-ақ Somewhere Over Laredo әнімен Лэйни Уилсон мен The Fall әнімен Коди Джонсон бақ таластырады. Бұл – Свифттің CMA-дағы 26-шы номинациясы: оның қоржынында сыйлықтың 12 марапаты бар, жеңіске жетсе, 13-ші марапатын алады. Жазда I Knew It, I Knew You әншінің соңғы 13 жылда АҚШ кантри-радиосында бірінші орынға шыққан алғашқы әні болды. Свифттің рәсімде қай әнді орындайтынын ұйымдастырушылар нақтыламады.
Свифт CMA Awards сахнасында соңғы рет 2013 жылы өнер көрсеткен – сол кезде ол Элисон Краусс және Винс Гиллмен бірге Red әнінің акустикалық нұсқасын орындаған. 2016 жылы ол рәсімге Гарт Брукске «Жыл әртісі» марапатын табыстау үшін келді. Свифттің өзі бұл марапатты 2009 және 2011 жылдары екі рет алған, әлі күнге дейін оның ең жас иегері болып қала береді.
Свифтпен бірге сахнаға аталымдар саны бойынша көш бастап тұрған Элла Лэнгли (оның тоғыз номинациясы бар), Миранда Ламберт, Тим Макгро, Кейси Масгрейвс, Люк Комбс, Крис Стэплтон, Винс Гилл, Mumford & Sons және басқа әртістер шығады. Рәсімді үшінші жыл қатарынан Лэйни Уилсон жүргізеді. Шоуда Долли Партон да еске алынады.
Рәсімді ABC және Disney+ арналары АҚШ-тың шығыс жағалауы уақытымен 20:00-ден 23:00-ге дейін көрсетеді – Қазақстанда бұл 19 қарашаның таңы, Астана уақытымен 06:00-ден 09:00-ге дейін. Свифттің әні енген «Ойыншықтар хикаясы 5» мультфильмі жазда Қазақстан прокатына қазақша дубляжбен шықты.
