Брэд Питт ойнаған «Аң жүрегі» (Heart of the Beast) триллерін енді Prime Video, Apple TV және Fandango at Home цифрлық сервистерінен сатып алуға немесе жалға алуға болады. Бұл туралы Collider басылымы хабарлады. Бұған дейін фильм АҚШ-тағы 2000-нан астам кинотеатрдан алынған еді.
Басылым дерегінше, картина әлемдік прокатта 188 млн доллар, яғни шамамен 83,6 млрд теңге жинады, ал оның бюджеті 82 млн доллар, шамамен 36,5 млрд теңге болған. Фильм прокатты баяу бастағанымен, көрермендер арасында тараған жақсы пікір кассалық табысын арттырды. Rotten Tomatoes сайтында «Аң жүрегі» сыншылардан 84% оң баға, көрермендерден 94% қолдау алды.
Питт арнайы жасақ ардагері Джеймс Белмонтты сомдады: ол Один есімді жауынгер итімен бірге Аляскада ұшақ апатынан аман қалады. Фильмді актермен бұған дейін 2014 жылғы «Қаһар» (Fury) әскери драмасында бірге жұмыс істеген Дэвид Эйр түсірді. Сценарийді Кэмерон Александер жазды, оқиға ойдан шығарылған. Фильмде Дж. К. Симмонс пен Анна Ламбе де ойнады. Картина кинотеатрларда 25 қыркүйекте шықты.
Питттің келесі премьерасы да жақын. 16 қарашада Лос-Анджелесте Дэвид Финчердің Квентин Тарантино сценарийі бойынша түсірген Клифф Бут туралы жаңа фильмі көрсетіледі: 25 қарашада ол IMAX кинотеатрларында, ал 23 желтоқсанда Netflix-те шығады. Жақында актер биіктік монтажшысын Apple-дің жаңа фильмінде сомдайтыны да белгілі болды.
Питт 62 жаста, ол — екі мәрте «Оскар» иегері: «Құлдықтағы 12 жыл» драмасының продюсері ретінде және «Бір кездері… Голливудта» фильміндегі рөлі үшін марапатталған. Оның мансабындағы ең кассалық фильм — былтыр шыққан «F1».
