Қарағандыда Майқұдықтағы Карл Маркс көшесінің бағдаршамдары енді «жасыл толқын» режимімен жұмыс істемейді. Жүргізушілер қазір әр қиылыста дерлік тоқтауға мәжбүр. Қарағанды қаласының әкімдігі мұның ақау емес, қауіпсіздік шарасы екенін түсіндірді: осылайша жүргізушілерді жылдамдықты азайтуға мәжбүрлейді.
Бағдаршамдардың жаңа тәртібіне қалалық автобус жүргізушісі назар аударған. Оның айтуынша, бірнеше қиылыстан қатарынан жасыл шамға өту мүмкін емес дерлік: көліктер орнынан қозғала бергенде, келесі бағдаршамда қызыл шам жанып тұрады.
Қала әкімдігі бағдаршамдардың жұмыс сызбасы қалалық әкімшілік полиция бөлімінің тапсырмасымен өзгертілгенін айтты. «Жол қозғалысы қауіпсіздігін қамтамасыз ету мақсатында жылдамдықты мәжбүрлеп төмендету үшін Қарағанды қаласы Әкімшілік полиция бөлімінің тапсырмасы бойынша К. Маркс көшесіндегі бағдаршамдардың жұмыс сызбасы өзгертілді, яғни бағдаршамдардың бұрынғы үйлестірілген жұмысы алынып тасталды», — деп хабарлады ведомство.
Бұрын бұл көшедегі бағдаршамдар бір-бірімен үйлесіп ауысатын, сондықтан көлік бірнеше қиылыстан тоқтамай өте алатын. Енді мұндай үйлесімді жұмыс жоқ. Бұл шара жүргізушілерді жылдамдықты азайтып, белгіленген жылдамдық режимін сақтауға мәжбүрлеуі тиіс. Бұл тәртіптің қанша уақытқа созылатынын әкімдік нақтыламады.
Карл Маркс көшесі Магнитогорская көшесімен бірге Қарағандының ең ірі тұрғын аудандарының бірі — Майқұдықтың басты жолы саналады. Екеуінің жалпы ұзындығы 11 шақырымға жуық.
