Қазақстандық таэквондошы Любовь Юн Дакарда өтіп жатқан IV жазғы жасөспірімдер Олимпиада ойындарында 63 келіден жоғары салмақта қола медаль жеңіп алды. 11 қарашадағы жартылай финалда ол сербиялық Эма Зечировичке раундтар есебімен 0:2 болып жеңілді. Олимпиадалық таэквондо турнирінің ережесі бойынша жартылай финалда жеңілген екі спортшы да қола алады, сондықтан қазақстандық қыз жүлдесіз қалмады.
Ұлттық олимпиада комитетінің хабарлауынша, Юннің медалі Қазақстанның осы Ойындардағы төртінші жүлдесі болды. Бұған дейін дзюдошы Фатима Супығалиева мен велошабандоз Анель Ташбай алтын, ал триатлоншы Рамазан Айнегов қола алған.
Юн — Дакардағы таэквондо жарысында Қазақстан намысын қорғаған жалғыз спортшы. Турнирді ол норвегиялық Сара Наташа Фемер-Педерсенді 17:1 және 15:0 есебімен ойсырата жеңуден бастады. Кейін бразилиялық Рафаэла Мейрелес да Коштаны 7:2 және 11:2 есебімен ұтып, жартылай финалға өтті.
Жасөспірімдер Олимпиада ойындарына 15–18 жастағы спортшылар қатысады, ал Дакар олимпиадалық жарыс өткізген Африкадағы алғашқы қала атанды. Қазақстанның медаль қоржыны 12 қарашада толығуы мүмкін: бокс турнирінің финалында Ақнұр Тұрсынғали мен Бибарыс Әшірбай рингке шығады.
